कञ्चनपुर – नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले भ्रष्टाचारी जोगाउन आफ्नो नेतृत्वको सरकार ढालिएको बताएका छन्।
बुधबार कञ्चनपुरको महेन्द्रनगरमा ‘जनतासँग माओवादी तराई मधेश जागरण अभियान’को समापन समारोहलाई सम्बोधन गर्दै उनले वर्तमान सरकार भ्रष्टाचारलाई प्रोत्साहन गर्न उद्यत रहेको दाबी गरे।“हाम्रो सरकारले सुशासनका क्षेत्रमा एकपछि अर्को सकारात्मक काम गरिरहेको थियो, तर यो विचौलिया, दलाल र नोकरशाहलाई पचेन,” प्रचण्डले भने, “त्यसैले रातको अँध्यारोमा सरकार ढालियो।
अहिलेको सरकार भ्रष्टाचार बनाउन लागिपरेको छ।”प्रचण्डले आफ्नो कार्यकालमा चीनसँग जोड्ने उत्तरी नाका विस्तार, भारत र बंगलादेशसँग विद्युत् व्यापार सम्झौता जस्ता काम अघि बढेको बताए। उनले पञ्चेश्वर परियोजना कुनै पनि हालतमा सफल पार्ने उद्घोष गरे।
साथै, माओवादी नेता स्व. पोस्टबहादुर बोगटीले ऊर्जा मन्त्रालय सम्हाल्दा पश्चिम सेती परियोजना अघि बढाउने योजना बनाए पनि पछिल्ला सरकारले रोकेको उनको भनाइ थियो। वर्तमान सरकारले शिक्षक आन्दोलनमाथि दमन गरेको आरोप लगाउँदै प्रचण्डले भने, “शिक्षकका माग पूरा गर्नुको साटो सरकार दमनमा उत्रिएको छ।आफैंले ल्याएको विधेयकमा सार्वजनिक प्रस्ताव दर्ता गरेपछि मात्र वार्ताको वातावरण बनेको छ।”
फागुनदेखि सुरु भएको माओवादीको अभियानलाई राष्ट्रिय अभियानको संज्ञा दिँदै प्रचण्डले किसान, मजदुर, सहिद परिवार र सर्वसाधारणसँग प्रत्यक्ष संवाद गरेको बताए। उनले आफ्नो कार्यकालमा सुदूरपश्चिममा शिक्षा, स्वास्थ्य र पूर्वाधारका थुप्रै योजना अघि बढेको उल्लेख गर्दै कञ्चनपुरको पुनर्वासमा प्राविधिक शिक्षालय निर्माण गरिने घोषणा गरे।
Discussion about this post