वेदकोट -९ का वडाध्यक्ष विष्टको निधन

कञ्चनपुर – वेदकोट नगरपालिका–९ का वडाध्यक्ष जनक बहादुर विष्टको निधन भएको छ। बुधबार दिउँसो वेदकोट ताल क्षेत्रमा बेहोस अवस्थामा भेटिएका विष्टको उपचारका क्रममा साँझ महाकाली अस्पतालमा निधन भएको हो। 

अस्पताल स्रोतका अनुसार विष्टको उपचारकै क्रममा मृत्यु भएको पुष्टि भएको छ। कञ्चनपुरका प्रहरी प्रमुख एसपी चक्रराज जोशीले वडाध्यक्षको निधनको कारणबारे अनुसन्धान भइरहेको बताएका छन्।

निधनको एक दिनअघि विष्टले सामाजिक सञ्जालमा ‘हाँसोभित्रको पीडा’ उल्लेख गर्दै फेसबुक स्टाटस लेखेका थिए। बुधबार बिहान उनले वडामा सामाजिक सुरक्षा भत्ता वितरण गरेर कामका लागि भन्दै मोटरसाइकलमा निस्किएका थिए। उनले वडासदस्य पार्वती विष्टलाई कावाको जिम्मेवारीसमेत सुम्पेका थिए।

नेपाली सेनाबाट सेवानिवृत्त विष्ट २०७४ मा वडासदस्य र २०७९ मा वडाध्यक्षमा निर्वाचित भएका थिए। उनको निधनले स्थानीय समुदायमा शोक छाएको छ।