प्रेस सेन्टर कञ्चनपुरले २१ औं स्थापना दिवस मनायो

कञ्चनपुर – प्रेस सेन्टर नेपालको २१ औं स्थापना दिवसका अवसरमा प्रेस सेन्टर कञ्चनपुरले पत्रकारहरूसँग छलफल र अभिमुखीकरण कार्यक्रमसहित दिवस मनाएको छ। श्रमजीवी पत्रकारहरूको संगठनका रूपमा स्थापित प्रेस सेन्टरले देशभर विविध कार्यक्रम गरी स्थापना दिवस मनाएको हो।

कञ्चनपुरमा आयोजित कार्यक्रम प्रेस सेन्टर कञ्चनपुरका अध्यक्ष अरुण भट्टको अध्यक्षतामा सम्पन्न भयो। शुभकामना आदानप्रदान तथा अभिमुखीकरण कार्यक्रममा नेपाल उद्योग व्यापार महासङ्घ सुदूरपश्चिम प्रदेशका महासचिव शिवराज पनेरु, नेकपा माओवादी केन्द्रका प्रदेश सदस्य दुर्गा जोशी, अखिल क्रान्तिकारीका जिल्ला अध्यक्ष डीबी अविरल, पत्रकार महासङ्घका सुदूरपश्चिम प्रदेशका सदस्य अर्जुनबहादुर सिंह, शाखा कञ्चनपुरका उपाध्यक्ष धर्मा रोकाया, कोषाध्यक्ष मोहन बिष्ट, र प्रेस सेन्टरका सल्लाहकार राजेन्द्र बिष्ट लगायतको उपस्थिति रहेको थियो।

उद्योग व्यापार महासङ्घ सुदूरपश्चिम प्रदेशका महासचिव शिवराज पनेरुले प्रेस सेन्टरको बलिदानी इतिहास र यसको जनपक्षीय भूमिकाको प्रशंसा गर्दै, व्यावसायिक पत्रकारितामा अगाडि बढ्नुपर्नेमा जोड दिए। यस्तै, महासङ्घ शाखा कञ्चनपुरका कोषाध्यक्ष मोहन बिष्टले पत्रकारिताका क्षेत्रको सफलताका लागि शुभकामना व्यक्त गरे।

कार्यक्रममा “व्यावसायिक पत्रकारिता र जनपक्षीय पत्रकारिता कसरी अघि बढाउन सकिन्छ” भन्ने विषयमा छलफल र सुझाव प्रस्तुत गरिएको प्रेस सेन्टर कञ्चनपुरका अध्यक्ष अरुण भट्ट बताए।

कार्यक्रममा सहभागीहरू सबैले प्रेस सेन्टरको ऐतिहासिक भूमिकालाई प्रशंसा गर्दै जनपक्षीय पत्रकारिता थप सशक्त बनाउनुपर्नेमा जोड दिए। पत्रकारहरूको पेशागत मर्यादा, जवाफदेहिता, र व्यावसायिक क्षमताका विषयमा गहन छलफल गरिएको थियो। कार्यक्रमले प्रेस सेन्टरको योगदान र पत्रकारिताका चुनौतीहरूलाई उजागर गर्दै श्रमजीवी पत्रकारहरूको सशक्तिकरणमा मार्गप्रशस्त गर्ने लक्ष्य राखेको छ।