दिपक नाथ, कञ्चनपुर । कञ्चनपुरको वेदकोट नगरपालिकामा पाँचौँ वेदकोट नगर स्तरीय तथा १५ औँ राष्ट्रपति रनिङ्ग शिल्ड प्रतियोगिता सम्पन्न भएको छ।
“स्वास्थका लागी खेल राष्ट्रका लागि खेलकुद“ भन्ने मूल नाराका गत बुधवार देखी भुवनेश्वरी मावि सिसैयाको प्राङ्गणमा सुरु भएको प्रतियोगिता शनिवार सम्पन्न भएको हो ।
समापन कार्यक्रममा वेदकोट नगर खेलकुद समितिका अध्यक्ष प्रजापति भट्टको सभापतित्व रहेको थियो भने वेदकोट नगरपालिकाका नगर उप प्रमुख तुलसी जोशीको प्रमुख आतिथ्य रहेको थियो।समापन कार्यक्रमको सञ्चालन भुवनेश्वरी माध्यमिक विद्यालय सिसैयाका विद्यालय व्यवस्थापन समितिका अध्यक्ष प्रबिन बोगटीले गर्नुभएको थियो।
प्रतियोगितामा सटपुट, लङ्ग जम्प, हाई जम्प, त्रीपल जम्प, ज्याबलिङ्ग थ्रो भलिबल, कबडडि लगायतका खेलहरूमा वेदकोट नगरभित्रका १२ सामुदायिक र ८ निजी गरी २० विद्यालयका विद्यार्थीबिच प्रतिस्पर्धा भएको भुवनेश्वरी माध्यमिक विद्यालय सिसैयाका व्यवस्थापन समिति अध्यक्ष बोगटीले बताउनुभएको छ।
प्रतियोगिताबाट २१ स्वर्ण १५ रजत र १३ काँस्य सहित उत्कृष्ट प्रदर्शन गरेर बैजनाथ माद्यमिक विद्यालय जडेपानी प्रथम हुन सफल भएको छ । त्यसै गरी प्रतियोगिताको संयोजक भुवनेश्वरी माद्यमिक विद्यालय सिसैया ६ स्वर्ण १२ रजत र ६ काँस्य प्राप्त गरेर प्रतियोगितामा द्वितीय हुन सफल भएको छ। रत्न माद्यमिक विद्यालय चतहरी ५ स्वर्ण ५ रजत र ९ काँस्य प्राप्त गरेर प्रतियोगितामा तृतीय भएको छ। त्यसैगरी सरस्वती माद्यमिक विद्यालय धरमपुर ४ स्वर्ण, २ रजत र ४ काँस्य प्राप्त गरेर चौथो स्थान प्राप्त गरेको छ।
प्रतियोगिताको समापन कार्यक्रममा बोल्दै वेदकोट नगर खेलकुद विकास समितिका अध्यक्ष प्रजापति भट्टले यो प्रतियोगिताबाट समाज र राष्ट्रलाई चाहिने खेलाडी उत्पादनमा महत्त्वपूर्ण योगदान पुर्याउने बताउँदै आगामी दिनमा पनि नगरमा विभिन्न प्रतियोगिताहरू सञ्चालन गरिने बताउनुभयो। कार्यक्रमका प्रमुख अतिथि एवम् वेदकोट नगरपालिकाका नगर उप प्रमुख तुलसी जोशीले नगरबाट आगामी दिनमा पनि विभिन्न प्रतियोगिता सञ्चालन गर्ने बताउनुभएको छ।
Discussion about this post