नेशनल प्याब्सन कञ्चनपुरले आयोजना गरेको खेल महोत्सव सम्पन्न

कञ्चनपुर । राष्ट्रिय निजी तथा आवासीय विद्यालय एसोसिएसन नेपाल (एन-प्याब्सन) कञ्चनपुरको आयोजना गरेको एनप्याब्सन खेलकुद महोत्सव २०८१ सम्पन्न भएको छ। पुस गते २६ देखि पुस २९ गते सम्म चलेको नेशनल प्याब्सन जिल्ला स्तरीय खेल महोत्सवको शुक्रवार जिल्ला समन्वय समिति कञ्चनपुरका प्रमुख दुर्गा दत्त बोहराको प्रमुख आतिथ्यमा समापन गरिएको छ।

प्रतियोगिताबाट रोजी एक्सक्लुसिभ स्कुल प्रथम हुन सफल भएको छ।रोजी स्कुल ७ स्वर्ण, ७ रजत र ५ कांस्य पदक जितेर प्रथम स्थान हासिल गर्न सफल भएको हो। त्यसैगरी लिटिल बुद्ध एकेडेमी द्वितीय भएको छ। लिटिल बुद्ध एकेडेमीले ७ स्वर्ण, ६ रजत र ५ कांस्य पदक प्राप्त गरेको छ भने तृतीय हुन सफल अनिरुद्र स्कुलले ६ स्वर्ण, ८ रजत, ९ कांस्य पदक प्राप्त गरेको छ। सान्तव्ना स्थान प्राप्त गरेको अनुपमले ५ स्वर्ण र १ रजत पदक प्राप्त गरेको छ।

प्रतियोगिता आधारभूत तह क (कक्षा १-५), आधारभूत तह ख (कक्षा ६-८) तथा माध्यमिक तह क (कक्षा ९-१०) र माध्यमिक तह ख (कक्षा ११-१२) गरी चार तहमा सञ्चालन गरिएको थियो।जसमा छात्र, छात्रा बिच लङ जम्प, हाई जम्प, सर्ट फुट, भलिबल, १ सय, २ सय ४ सय मिटर दौड जस्ता खेलहरूमा प्रतिस्पर्धा भएको थियो।खेलकुद महोत्सवमा ५२ स्वर्ण, ५२ रजत र ६६ कांस्य पदकका लागि खेलाडीहरूबिच प्रतिस्पर्धा गरेका थिए।

आधारभुत तह ‘क’ बाट रोजी एक्सक्लुसिभ प्रथम, गोल्डेन फ्युचर द्वितीय र अनुपम तृतीय हुन सफल भएको छ भने फ्लोरिडा स्कुलले सानतव्ना स्थान प्राप्त गरेको छ। आधारभुत तह आधारभुत तह ‘ख’ बाट अनुपम स्कुल प्रथम, सार्क स्कुल द्वितीय भएको छ भने अनिरुद्र, एपेक्स र ज्योति स्कुलले तृतीय स्थान हात पारेको छ।

त्यसैगरी माध्यमिक तह ‘क’ बाट डायमन्ड स्कुल प्रथम, अनिरुद्र स्कुल द्वितीय, रोजी एक्सक्लुसिभ स्कुल तृतीय भएको छ भने सञ्जीवनी शुक्लाफाँटाले सान्त्वना स्थान प्राप्त गरेको छ।माध्यमिक तह ‘ख’ बाट लिटिल बुद्ध ऐकेडेमी प्रथम, अनिरुद्र स्कुल द्वितीय, रोजी एक्सक्लुसिभ तृतीय र सार्क स्कुलले सान्त्वना स्थान प्राप्त गरेको छ।

खेल महोत्सवमा २ हजार विद्यार्थीले प्रतिस्पर्धा गरेका थिए। जसमध्ये ३५६ खेलाडी विभिन्न खेल विधामा पुरस्कृत भएका छन्। ५७ विद्यालय खेल महोत्सवमा सहभागी भएका थिए।

त्यसैगरी प्रतियोगिताबाट माध्यमिक तह ‘ख’ छात्रा भलिबल तर्फ जनज्योति माध्यमिक विद्यालयकी बन्दना बोहरा उत्कृष्ट खेलाडी घोषित भएकी छन्। माध्यमिक तह ‘ख’ छात्र भलिबल तर्फ रोजी एक्सक्लुसिभका विजय महत उत्कृष्ट खेलाडी घोषित भएका छन्। माध्यमिक तह ‘क’ छात्रा भलिबल तर्फ लिटिल बुद्ध एकेडेमीकी देबकी भट्ट उत्कृष्ट खेलडी घोषित भएकी छन्।माध्यमिक तह ‘क’ छात्र भलिबलतर्फ डायमन्ड स्कुलका जनक सिहं बोहरा उत्कृष्ट खेलाडी घोषित भएका छन्।

खेल महोत्सवमा छात्रातर्फ समीक्षा भण्डारी उत्कृष्ट एथलेटिक्स घोषित भएकी छन् भने छात्रतर्फ लिटिल बुद्ध एकेडेमीका पुकार चन्द उत्कृष्ट एथलेटिक्स घोषित भएका छन्।

विद्यार्थीहरूको अन्तर्निहित प्रतिभालाई बाहिर ल्याउने उद्देश्यले नेशनल प्याब्सन कञ्चनपुरले प्रत्येक वर्ष खेल महोत्सव आयोजना गर्दै आइरहेको नेशनल प्याबसन कञ्चनपुरका सहसचिव सुरेन्द्र राज जोशीले बताएका छन्। प्रत्येक वर्ष विद्यार्थीहरू विभिन्न खेल विधामा सहभागी हुने गरेको उनले बताए।

अहिलेको समयमा युवा पुस्ता लागू औषधको चपेटमा देखिन्छ तर यस्ता खेल महोत्सव तथा प्रतियोगिताहरूले विद्यार्थीलाई लागू औषधबाट टाढा रहन समेत मद्द गर्ने नेशनल प्याब्सन कञ्चनपुरका अध्यक्ष सत्येश बहादुर चन्दको भनाइ रहेको छ।

महेन्द्रनगरस्थित कभर्ड हलमा सञ्चालन गरिएको समापन कार्यक्रमको सञ्चालन नेशनल प्याब्सन कञ्चनपुरका वरिष्ठ उपाध्यक्ष बलदेव भट्टले गरेका थिए। प्रत्येक वर्ष आयोजना हुने खेल महोत्सवले खेलाडी विद्यार्थीहरूलाई हौसला र प्रोत्साहन दिने कार्य गरिरहेको नेशनल प्याब्सन कञ्चनपुरका सचिव कुबेर खड्काले बताएका छन्।