कैलाली । कैलालीको चुरे गाउँपालिकामा रहेका सामुदायिक विपद् व्यवस्थापन समितिहरूलाई दक्ष बनाउने उद्देश्यले ५ दिने ‘सामुदायिक प्रतिकार्य टोली तालिम’ सुरु भएको छ। चुरे गाउँपालिकाका अध्यक्ष चक्र बहादुर बोगटीको सभाध्यक्षतामा एक औपचारिक कार्यक्रमका बीच तालिमको उद्घाटन गरिएको हो।
मर्सीकोर नेपाल, नेपाल राष्ट्रिय समाज कल्याण सङ्घ (एनएनएसडब्लुए) र द कोकाकोला फाउन्डेसनद्वारा सञ्चालित ‘नेपालमा पूर्वानुमानमा आधारित पूर्वकार्यको सुदृढीकरण’ (सान) परियोजना अन्तर्गत उक्त तालिम सञ्चालन गरिएको हो। तालिममा चुरे गाउँपालिका वडा नम्बर ४ र ५ अन्तर्गतका चारवटा सामुदायिक विपद् व्यवस्थापन समितिका ६–६ जना गरी कुल २४ जना प्रशिक्षार्थीहरूको सहभागिता रहेको छ।
सान परियोजनाका संयोजक देवराज बडुले ५ दिनसम्म सहभागीहरूलाई विपद्का समयमा आवश्यक पर्ने आधारभूत खोज तथा उद्धार, सामुदायिक नक्सांकन, सञ्चार र समुदाय परिचालनका बारेमा प्रयोगात्मक अभ्यास गराइने बताउनुभयो। उहाँका अनुसार तालिममा आगलागी, आपतकालीन अवस्था व्यवस्थापन, पानीजन्य आपतकालीन अवस्था र घाइतेको सुरक्षित उद्धार तथा स्थानान्तरण सम्बन्धी सीपमा सहभागीहरूलाई दक्ष बनाइनेछ।
यसैगरी, तालिममा महामारी परिचय, प्राथमिक उपचार, मनोसामाजिक सहयोग, मुटु तथा फोक्सो पुनर्जीवन प्रक्रिया (CPR), रक्तस्राव र चोटपटक व्यवस्थापन, तनाव व्यवस्थापन, जलन (Burn) व्यवस्थापन तथा विषाक्तता र जनावरको टोकाइ सम्बन्धी उपचारका बारेमा समेत विस्तृत व्यवहारिक ज्ञान प्रदान गरिनेछ।
उद्घाटन कार्यक्रममा वडा नम्बर ४ का वडा अध्यक्ष चन्द्र बहादुर लामिछाने मगर र वडा नम्बर ५ का वडा अध्यक्ष वीर बहादुर धामी लगायतको उपस्थिति रहेको थियो।
कार्यक्रममा बोल्दै चुरे गाउँपालिकाका अध्यक्ष चक्र बहादुर बोगटीले तालिममा सिकेका सीपहरूलाई गम्भीरतापूर्वक लिन र यसलाई आफ्नो समुदायको सुरक्षामा उपयोग गर्न आग्रह गर्नुभयो। उहाँले चुरे क्षेत्रको भौगोलिक विकटता र विपद्को जोखिमलाई मध्यनजर गर्दै स्थानीय स्तरमै यस्तो दक्ष प्रतिकार्य टोली तयार हुनु गौरवको विषय भएको बताउनुभयो।
यसअघि सान परियोजना अन्तर्गत चुरे गाउँपालिका वडा नम्बर -३ र -६ अन्तर्गतका कालिका, पिपल चौतारा, शान्तिनगर र लेकबेसी सामुदायिक विपद् व्यवस्थापन समितिका ६–६ जना गरी कुल २४ जनालाई तालिम प्रदान गरिएको छ।
Discussion about this post