कञ्चनपुर – कञ्चनपुरका एक पूर्व सांसदले आफ्ना नाति, नातिनीलाई सरकारी विद्यालयमा भर्ना गराएका छन् । सुदूरपश्चिम प्रदेश सभा सदस्य (पूर्व) सांसद महेश दत्त जोशीले आफ्ना नाति, नातिनीलाई सरकारी विद्यालयमा भर्ना गराएका हुन् ।
कृष्णपुर नगरपालिका -०२ वाणी कञ्चनपुर बस्ने पूर्व सांसद जोशीले एक नाति, दुई नातिनीलाई बोर्डिङबाट छुटाएर सामुदायिक सरस्वती माध्यामिक विद्यालयमा भर्ना गराएका हुन । सोमबार जेठी नातिनी अनुष्का जोशीलाई कक्षा ८, आयुशा जोशीलाई कक्षा ६ र नाति जीवन जोशीलाई कक्षा ४ मा भर्ना गराएको विद्यालयले जनाएको छ ।
सरस्वती माध्यामिक विद्यालय व्यवस्थापन समितिका अध्यक्ष समेत रहेका पूर्व सांसद एव समाजसेवी जोशीले सामुदायिक विद्यालयको स्तरवृद्धिका लागि सरोकारवाला सबैले आ–आफ्नो ठाउँबाट भूमिका निर्वाहमा जोड दिएका छन् ।
हजारौँ रकम खर्चिएर बोर्डिङ पढाउने सार्मथ्य हुँदाहुँदै पनि सांसद जोशीले आफ्ना नाति नातिनीलाई सामुदायिक विद्यालयमा भर्ना गराएको भन्दै स्थानीय नागरिक समाजले प्रशंसा गरेका छन । नेकपा माओवादी केन्द्रका नेता समेत रहेका जोशीले समाज सुधार र परिवर्तन अरुबाट नभई आफैबाट गर्नुपर्छ भन्ने उदाहरण देखाएका छन् ।
Discussion about this post