कञ्चनपुर । नेपाल सरकारका गृहमन्त्री कञ्चनपुर भ्रमणमा रहेका बेला भीमदत्त नगरपालिका स्तरीय उत्थानशील युवा सञ्जालले आज गृहमन्त्रीलाई प्रत्यक्ष भेटमार्फत १० बुँदे मागसहितको ज्ञापनपत्र हस्तान्तरण गरेको छ।
सञ्जालका संयोजक उत्तम सुनारको नेतृत्वमा बुझाइएको यस ज्ञापनपत्रमा युवा नेतृत्व विकास, नीति निर्माणमा युवा सहभागिता, विपद् जोखिम न्यूनीकरण र लागूऔषध नियन्त्रणजस्ता महत्त्वपूर्ण विषयमा तत्काल हस्तक्षेप र दीर्घकालीन नीतिगत सुधारको माग गरिएको छ।युवा सञ्जालले विपद् पूर्वतयारी र प्रतिकार्यका लागि युवाहरूलाई तालिम, सूचना र उपकरणसहित सक्रिय रूपमा परिचालन गरिनुपर्नेमा जोड दिएको छ।
खोज, उद्धार, राहत वितरण र पुनःस्थापनाका कार्यमा युवाको ऊर्जा र पहुँचको पूर्ण उपयोग गर्नुपर्ने उनीहरूको भनाइ छ।यसैगरी, स्थानीय, प्रदेश र संघीय तहमा युवाको समावेशी प्रतिनिधित्व सुनिश्चित गर्नुपर्ने माग पनि ज्ञापनपत्रमा गरिएको छ। युवाका प्रतिनिधिहरूलाई सल्लाहकार वा निर्णायक भूमिकामा राख्न नीतिगत व्यवस्था गर्न सञ्जालले आग्रह गरेको छ।ज्ञापनपत्रमा लागूऔषध दुर्व्यसनको समस्या गम्भीर बन्दै गएको भन्दै विद्यालय, समुदाय र मिडियामार्फत व्यापक जनचेतना अभिवृद्धि कार्यक्रम ल्याउन सरकारको ध्यानाकर्षण गराइएको छ। साथै, लागूऔषध छाड्न चाहने युवाहरूका लागि सहज पुनःस्थापना र परामर्श सेवा विस्तार गर्नुपर्ने माग पनि राखिएको छ।
बढ्दो मानसिक स्वास्थ्य चुनौतीलाई सम्बोधन गर्न युवामैत्री परामर्श सेवा, हेल्पलाइन, मनोवैज्ञानिक सहयोग र पुनःस्थापना केन्द्रहरू स्थापना गर्नुपर्ने आवश्यकता औँल्याइएको छ।
सञ्जालले युवाको क्षमता अभिवृद्धि तथा आत्मनिर्भरता विकासका लागि सूचना प्रविधि, वातावरण, उद्यमशीलता, विपद् व्यवस्थापन र कृषि उद्यमजस्ता क्षेत्रमा तालिम तथा सहयोग कार्यक्रम सञ्चालन गर्न माग गरेको छ। स्थानीय स्तरमा स्वतन्त्र रूपमा क्रियाशील युवा क्लब, समूह र सञ्जालहरूलाई कानुनी मान्यता, आर्थिक सहयोग र प्राविधिक शान्ति सुरक्षाको सुदृढीकरणमा युवाको भूमिका महत्त्वपूर्ण रहेको जनाउँदै सञ्जालले प्रहरी प्रशासन र युवाबीच समन्वयकारी संयन्त्र बनाउन आवश्यक रहेको उल्लेख गरेको छ।साइबर सुरक्षालाई थप कडाइ गरी युवामाथिको डिजिटल हिंसा नियन्त्रण गर्नुपर्ने सन्देश पनि ज्ञापनपत्रमार्फत दिइएको छ।
भीमदत्त नगरपालिकालाई ‘युवामैत्री नगरपालिका’ घोषणा गर्न आवश्यक कानुनी र संरचनागत प्रक्रिया अगाडि बढाउन सरकारको पहल हुनुपर्ने मुख्य मागमध्ये एक हो। यसअन्तर्गत युवा नीति, युवा कार्यक्रमका लागि विनियोजित बजेट र युवा समन्वय इकाईको स्थापना जस्ता विषयहरू समेटिएका छन्।गृहमन्त्रीको सकारात्मक प्रतिक्रियाप्रत्यक्ष भेटका क्रममा गृहमन्त्रीले ज्ञापनपत्रमा समेटिएका विषयहरू व्यावहारिक र यथार्थपरक रहेको भन्दै गृह मन्त्रालयमार्फत सम्बन्धित निकायहरूसँग समन्वय गरी आवश्यक पहल गरिने प्रतिबद्धता जनाएको सञ्जालका संयोजक सुनारले जानकारी दिए।
ज्ञापनपत्र बुझाउने क्रममा विभिन्न युवा समूहका प्रतिनिधिहरू, सामाजिक अभियन्ता तथा स्थानीय युवा स्वयंसेवकहरूको उपस्थिति थियो। यस घटनाले कञ्चनपुरमा युवा सहभागिता र सचेतनाको स्तर मजबुत बन्दै गएको स्पष्ट सन्देश दिएको छ।
Discussion about this post