कञ्चनपुर । कञ्चनपुरको मन्त्र अस्पताल एण्ड रिसर्च सेन्टर र एनएमबी बैंक लिमिटेडबीच बिहीबार एक महत्वपूर्ण सम्झौता (एमओयु) भएको छ। यस सम्झौता अनुसार, एनएमबी बैंकमा खाता भएका सदस्यहरूले मन्त्र अस्पतालमा उपचार गराउँदा विशेष छुट प्राप्त गर्नेछन्।
सम्झौतापत्रमा एनएमबी बैंक लिमिटेडका सुदूरपश्चिम एवम् कर्णाली प्रदेश प्रमुख बिरुराम जैशी र मन्त्र अस्पतालका अध्यक्ष कैलाशचन्द्र भट्टले हस्ताक्षर गरेका छन्।
मन्त्र अस्पतालका मेडिकल डाइरेक्टर डा. गोविन्द रोकायका अनुसार, बैंकका सदस्यहरूलाई अस्पतालमा भर्नादेखि लिएर विभिन्न स्वास्थ्य सेवाहरूमा ५ प्रतिशतदेखि २५ प्रतिशतसम्म छुटको व्यवस्था गरिनेछ। यो सम्झौताले बैंकका सदस्यहरूलाई स्वास्थ्य उपचारमा विशेष सहुलियत प्रदान गर्ने उनको भनाइ छ।
बैंकका प्रमुख जैशीले आफ्ना सदस्यहरूले उपचारका लागि आउँदा आफ्नो एटीएम कार्ड वा चेक देखाएर स्वास्थ्य जाँचमा छुट पाउन सक्ने व्यवस्था मिलाइएको जानकारी दिए। यस सम्झौताले बैंकका ग्राहक तथा कर्मचारीहरू दुवैलाई मन्त्र अस्पतालमा सहुलियत दरमा स्वास्थ्य उपचारको अवसर मिल्नेछ।
मन्त्र अस्पतालले पछिल्लो समयमा सामाजिक उत्तरदायित्व अन्तर्गत विभिन्न कार्यहरू गर्दै आइरहेको छ। यो सम्झौता पनि सोही सामाजिक उत्तरदायित्वको एक हिस्सा हो।
Discussion about this post