कञ्चनपुर । कञ्चनपुरमा सुदूरपश्चिम प्रदेशका युवाहरूको क्षमता उजागर गर्ने र उनीहरूको भविष्य निर्माणमा सशक्त योगदान पुर्याउने उद्देश्यले नोट स्विफ्टले सार्क एकुसन फाउन्डेसनसँगको सहकार्यमा “सपनाको उडान २०८२” कार्यक्रम आयोजना गर्न लागेको छ। यो कार्यक्रम असार २० गते भीमदत्तनगरको द रोयल क्राउन पार्टी प्यालेसमा भव्य रूपमा सम्पन्न हुनेछ। यसमा सुदूरपश्चिमका ५०० भन्दा बढी विद्यार्थीहरू सहभागी हुने अपेक्षा गरिएको छ।
“जहाँ सपनाले उडान भर्ने गर्छन्” भन्ने नाराका साथ प्रस्तुत गरिएको यो कार्यक्रम कुनै साधारण सम्मेलन भन्दा फरक हुनेछ। यो कार्यक्रमले सुदूरपश्चिमका युवाहरूको अप्रयुक्त क्षमता, साहसी आवाज र रचनात्मक ऊर्जाको उत्सव मनाउनेछ। यसले युवाहरूलाई आफ्नो भविष्यको स्पष्ट चित्र कोर्न, आत्मविश्वास बढाउन र जीवनको अर्को अध्यायमा अग्रसर गराउन महत्त्वपूर्ण भूमिका खेल्ने आयोजकले बताएका छन्।
कार्यक्रमका मुख्य आकर्षणहरूमा अनुभवी व्यक्तित्वहरूसँग हुने करियर प्यानल छलफल, एक-देखि-एक करियर परामर्श, तथा सीप विकास र आत्मपरिवर्तनका विषयमा विशेष सत्रहरू समावेश छन्। विद्यार्थीहरूले आफ्नो रुचि, क्षमता र लक्ष्यअनुसार मार्गदर्शन प्राप्त गर्नेछन्, जसले उनीहरूलाई अध्ययन तथा पेसा चयनमा सजिलो बनाउनेछ। साथै, कार्यक्रममा नेता, प्रशिक्षक, सामाजिक अभियन्ता, र प्रेरक वक्ताहरूसँग नेटवर्किङ गर्ने अवसर पनि प्रदान गरिनेछ, जसले युवाहरूको सामाजिक र पेसागत सञ्जाल विस्तारमा मद्दत पुर्याउनेछ।
शैक्षिक र करियरमूलक विषयसँगै, कार्यक्रमले मनोरञ्जनात्मक तथा सांस्कृतिक पक्षहरूलाई पनि उत्तिकै महत्त्व दिएको छ। विद्यार्थीहरूको मनोरञ्जनका लागि गेमिङ र फन जोन, रमाइला गतिविधिहरूको व्यवस्थासहित स्थानीय युवा कलाकारहरूद्वारा प्रस्तुत संगीत, नृत्य, स्ट्यान्डअप कमेडी, र कलाको प्रस्तुति समेत रहनेछ। यी सबै प्रस्तुति सुदूरपश्चिमका ग्रामीण क्षेत्रका प्रतिभाहरूलाई उजागर गर्न लक्षित छन्।
अर्कोतर्फ, कार्यक्रमको टेक शोकेस खण्डमा विद्यार्थीहरूले बनाएका नवप्रवर्तन तथा प्रोजेक्टहरू प्रदर्शन गरिनेछ, जसले उनीहरूको सिर्जनशीलता र नवप्रवर्तन क्षमतालाई अभिव्यक्त गर्ने मञ्च प्रदान गर्नेछ। साथै, योग्य विद्यार्थीहरूका लागि छात्रवृत्तिको अवसर पनि कार्यक्रममार्फत प्रदान गरिनेछ, जसले उनीहरूको शैक्षिक यात्रा सहज बनाउनेछ।
विशेष गरी एसईई र +२ तह सकाएका विद्यार्थीहरूका लागि यो कार्यक्रम जीवन परिवर्तनको मोड सावित हुनसक्ने आयोजकको विश्वास छ। उनीहरूलाई आगामी निर्णयहरूमा स्पष्टता, आत्मविश्वास र व्यवहारिक उपकरणहरू प्रदान गर्नु नै यस कार्यक्रमको मूल उद्देश्य हो।
कार्यक्रममा सीमित सिट मात्र उपलब्ध रहेकोले, इच्छुक विद्यार्थी तथा अभिभावकहरूलाई शीघ्र दर्ता गर्न आयोजकले आग्रह गरेका छन्। दर्ता गर्नका लागि QR कोड स्क्यान गर्न वा https://noteswift.in/sapana-ko-udaan/ लिङ्कमा क्लिक गर्न सकिनेछ।
Discussion about this post