कञ्चनपुर । कञ्चनपुरको दोधारा चाँदनी नगरपालिकामा नगर प्रहरीले साता व्यापी सरसफाइ अभियान थालेको छ । दोधारा चाँदनी नगर प्रहरीले दोधारा चाँदनी नगरपालिकाको मूल सडक खण्ड क्षेत्रमा साता व्यापी सरसफाइ अभियान थालेको दोधारा चाँदनी नगरपालिका कार्यालयले जनाएको छ ।
दोधारा चाँदनी नगरपालिकाको मूल सडक खण्ड क्षेत्रमा साता व्यापी सरसफाइ कार्यको सुरुवात गरिएको दोधारा चाँदनी नगरपालिकाका नगर प्रहरी तिलकराज भट्टले जानकारी दिनुभएको छ । दिन प्रतिदिन बढ्दै गइरहेको सडक दुर्घटना रोकथाम सँगै न्यूनीकरण गर्न दोधारा चाँदनी नगरपालिकाको मूल सडक खण्डमा सचेतना मूलक कार्यक्रम सञ्चालन गरिएको नगर प्रहरी हवलदार तिलकराज भट्टले बताउनुभयो ।
सडक छेउमा रहेको झाडीको कारण दुर्घटनाको जोखिम बढेपछि नगर प्रहरीले सडक छेउको झाडी समेत हटाउने काम सञ्चालन गरिएको उहाँले बताउनुभयो । सडकमा उम्रेका झाडी तथा फोहरका कारण सडक दुर्घटना हुने तथा डेंगु तथा मलेरिया जस्ता रोग लाग्ने भएको हुँदा साताव्यापी सरसफाइ अभियानलाई अघि बढाएको नगर प्रहरी हवलदार तिलकराज भट्टको भनाई छ ।
सरसफाइले गर्दा वातावरण सफा र चिटिक्क देखिने र दुर्घटना न्यूनीकरणमा ठुलो सहयोग पुग्ने बताइएको छ । साताव्यापी सरसफाइ अभियानमा दोधारा चाँदनी नगरपालिकाका १५ जना नगर प्रहरी परिचालित भएको दोधारा चाँदनी नगरपालिका कार्यालयले जनाएको छ । नगर प्रहरीले सुरु गरेको सरसफाइ अभियान प्रति स्थानियबासीहरूले खुसी प्रकट गरेका छन् ।
Discussion about this post