काठमाडौं – एफसी चितवनले बिहीबार धनगढी एफसीलाई ३–१ गोलले पराजित गर्दै तेस्रो नेपाल सुपर लिग (एनएसएल) को प्लेअफमा स्थान पक्का गरेको छ। समूह चरणको अन्तिम खेलमा धनगढीको हारसँगै ललितपुर सिटी एफसी १२ अङ्कसहित शीर्ष स्थानमा उक्लिएको छ।
धनगढी एफसी ११ अङ्कसहित दोस्रो स्थानमा रहेर शनिबार ललितपुरसँग क्वालिफायर वन खेल्नेछ। यो खेलको विजेता सिधै फाइनलमा प्रवेश गर्नेछ। गत संस्करणमा ललितपुरले धनगढीलाई फाइनलमा हराएर उपाधि जितेको थियो।
चितवन १० अङ्कसहित तेस्रो स्थानमा पुग्दै प्लेअफमा प्रवेश गरेको छ। यो जितले पहिलो संस्करणको विजेता काठमाडौं रेजर्सको प्लेअफ यात्रा समाप्त भएको छ। चितवनले अब इलिमिनेटरमा चौथो स्थानको पोखरा थन्डर्ससँग खेल्नेछ। इलिमिनेटरको विजेताले क्वालिफायर वनको पराजित टिमसँग फाइनल प्रवेशका लागि प्रतिस्पर्धा गर्नेछ।
दशरथ रङ्गशालामा भएको खेलमा चितवनका लागि नोदिरबेक माभ्लोनोभ र जय गुरुङले गोल गरे भने एक गोल धनगढीका अमृत श्रेष्ठको आत्मघाती गोलमार्फत प्राप्त भयो। धनगढीका जर्जप्रिन्स कार्कीले सातौँ मिनेटमा ४० गज टाढाबाट शानदार गोल गर्दै खाता खोलेका थिए। तर, चितवनले १४औँ मिनेटमा माभ्लोनोभको पेनाल्टी गोलमार्फत बराबरी गर्यो। पहिलो हाफको अतिरिक्त समयमा जय गुरुङले गोल गर्दै चितवनलाई अग्रता दिलाए। दोस्रो हाफको पाँचौँ मिनेटमा अमृतको आत्मघाती गोलले चितवनको जित सुनिश्चित भएको थियो।
धनगढीले शीर्ष दुई स्थान पक्का भइसकेकाले दोस्रो रोजाइको टिम उतारेको थियो, जसमा विदेशी खेलाडीका रूपमा अफिज ओलावालेलाई मात्र समावेश गरिएको थियो। चितवन भने पूर्ण शक्तिका साथ मैदानमा उत्रिएको थियो। यो जितले चितवनको प्लेअफ सपना साकार भएको छ भने धनगढी र ललितपुरबीचको क्वालिफायर वन रोमाञ्चक हुने अपेक्षा गरिएको छ।
Discussion about this post