कञ्चनपुर । जिल्ला ट्राफिक प्रहरी कार्यालय कञ्चनपुरले सडक सुरक्षा तथा ट्राफिक सचेतना सप्ताहको तेस्रो दिन बुधवार महेन्द्रनगर बजारका बिभिन्न क्षेत्रहरूमा सचेतनामूलक होर्डिङ बोर्ड स्थापना र सडकहरूमा जेब्रा क्रसिङ निर्माण गरेको छ । जिल्ला ट्राफिक प्रहरी कार्यालय कञ्चनपुरका प्रमुख प्रहरी निरीक्षक नरेश विकले सडक सुरक्षा तथा ट्राफिक सचेतना सप्ताहको तेस्रो दिनमा दुर्घटना न्यूनिकरण गर्न कम गर्न आवश्यक पर्ने सचेतनामूलक होर्डिङ बोर्डहरू सडक क्रस गर्दा चाहिने जेब्रा क्रसको निर्माण गरिएको बताए ।
सडक सुरक्षा तथा ट्राफिक सचेतना सप्ताह मा बिभिन्न सङ्घसंस्थाहरूको सहयोग रहेको हुँदा कार्य गर्न सहज भएको उनले बताए । ट्राफिक नियमले आफूलाई बाँध्नको होइन, सुरक्षित बनाउनका लागी हो त्यसैले सबैले ट्राफिक नियमको उचित रुपमा पालना गरिदिने हो भने सडक प्रयोग गर्ने सबै सुरक्षित रहने उनले बताए । तिव्र गतिमा सवारी साधन नचलाउने, मादक पदार्थ सेवन गरेर सवारी नहाँक्ने, आफ्नै लेनमा हिँडने, ट्राफिक नियमको पालना गर्ने लगायतका जनचेतनामूलक भनाई लेखिएका होर्डिङ बोर्डहरू राखिएका छन् ।
दोस्रो दिनमा सवारी चालक, अटो चालकलाई ट्राफिक नियम, कसरी दुर्घटना न्यूनिकरण गर्न सकिन्छ, लगायतको विषयमा प्रशिक्षण दिइएको र बुधवार सडकमा ट्राफिक सचेतना सहितका बोर्डहरू राख्ने, क्रस गर्ने बाटोमा जेब्रा क्रसिङ लाइन बनाउने काम सम्पन्न भएको उनले बताए । उनले बिहीवार यातायात कार्यालयसँग समन्वय गरी सवारीसाधनको यान्त्रिक परिक्षण गर्ने, लामो तथा छोटो दूरीका चालकहरूको स्वास्थ्य परिक्षण गर्ने, पर्चा पम्पलेट माइकिङ आदी कार्य सप्ताहव्यापी गरिने जिल्ला ट्राफिक प्रहरी कार्यालय कञ्चनपुरका प्रमुख विकले जानकारी दिए ।
Discussion about this post