काठमाडौं । परराष्ट्रमन्त्री शिशिर खनालले चीनसँगको तातोपानी नाका तत्काल सञ्चालनमा ल्याउन आग्रह गरेका छन्।
बिहीबार परराष्ट्र मन्त्रालयमा नेपालका लागि चिनियाँ राजदूत चाङ माओमिङसँग भएको शिष्टाचार भेटवार्ताका क्रममा मन्त्री खनालले तातोपानी नाका सञ्चालनमा ल्याउन जोड दिएका हुन्।
उनले केही समयअघि रसुवा–भोटेकोशी क्षेत्रमा आएको बाढीका कारण रसुवागढी नाका बन्द रहेको र हिउँदमा चीनसँग जोडिएका अन्य उच्च हिमाली नाकासमेत पूर्ण रूपमा सञ्चालन गर्न कठिन हुने अवस्था रहेको उल्लेख गरे।
यस्तो परिस्थितिमा काठमाडौंसँग सबैभन्दा नजिक रहेको तातोपानी नाका तत्काल सञ्चालनमा ल्याउनु आवश्यक रहेको उनको भनाइ थियो।
मन्त्री खनालले तातोपानी नाका नेपाल र चीनबीचको ऐतिहासिक मित्रताको प्रतीकसमेत रहेकाले दुई देशबीचको सम्पर्क सञ्जाल र आवागमन सहज बनाउन नाका खुलाउनुपर्नेमा जोड दिएका थिए।
जवाफमा चिनियाँ राजदूत चाङले तातोपानी नाका सञ्चालनका विषयमा सम्बन्धित निकायसँग आवश्यक समन्वय गरी काम गर्ने जानकारी दिएका थिए।
भेटवार्ताका क्रममा बाढीपछिको पुनर्निर्माण, नेपाल–चीन सम्बन्ध, बहुपक्षीयता तथा आपसी हित र चासोका विभिन्न विषयमा समेत छलफल भएको परराष्ट्र मन्त्रालयले जनाएको छ।










Discussion about this post