काठमाडौं । नेकपा एमालेकी वरिष्ठ नेता विद्यादेवी भण्डारीले निरंकुशता, स्वेच्छाचारिता र अराजकता कुनै पनि रूपमा स्वीकार्य नहुने बताउनुभएको छ ।
एमालेको राष्ट्रिय भेलाको दोस्रो दिन आयोजित बन्दसत्रलाई सम्बोधन गर्दै उहाँले लोकतान्त्रिक व्यवस्थामा प्रतिपक्षको सम्मान र संवैधानिक निकायको स्वतन्त्रता कायम हुनुपर्नेमा जोड दिनुभयो ।
भण्डारीले राजनीतिक दलहरूसँग पर्याप्त छलफल र सहमति नगरी संविधान संशोधनजस्ता दूरगामी महत्त्वका विषय अघि बढाउँदा राजनीतिक अविश्वास सिर्जना हुने बताउनुभयो । यस्ता विषयमा संसद्मा प्रतिनिधित्व गर्ने दलहरूबीच पर्याप्त छलफल र राष्ट्रिय सहमति आवश्यक रहेको उहाँको भनाइ थियो ।
उहाँले सरकार निरंकुश बन्न नहुने उल्लेख गर्दै राज्यका कुनै पनि निकाय र अंग संविधानभन्दा माथि हुन नसक्ने धारणा राख्नुभयो ।
सरकारका निर्णय तथा गतिविधि संविधान, कानुन र लोकतान्त्रिक उत्तरदायित्वको सीमाभित्र रहनुपर्नेमा जोड दिँदै उहाँले भन्नुभयो, “जुनसुकै रूपमा प्रकट हुने निरंकुशता, स्वेच्छाचारिता र अराजकता नेकपा एमालेलाई स्वीकार्य हुँदैन ।”
लोकतान्त्रिक मूल्य, मान्यता र संवैधानिक व्यवस्थाको संरक्षण गर्नु सबै राजनीतिक शक्तिको जिम्मेवारी भएको उहाँको भनाइ थियो ।










Discussion about this post