बैतडी । बैतडीको प्रसिद्ध धार्मिकस्थल शिवनाथ देवालयमा यही कात्तिक ३० गते परम्परागत जात्रा लाग्ने भएको छ।
शिवनाथ मन्दिरमा हरेक वर्ष कात्तिक शुक्ल सप्तमीको राति रतेडी तथा अष्टमीको बिहान दिसेडी मेला लाग्ने गर्दछ। मेला व्यवस्थापन समितिका अध्यक्ष कर्ण सिंह धनाडीका अनुसार यस वर्ष पनि परम्परागत विधिअनुसार जात्रा सञ्चालन गरिनेछ।
शिवनाथ गाउँपालिका–६ मा अवस्थित प्रसिद्ध शिवनाथ मन्दिरमा मेला सुरु हुनुअघि धामी तथा पुजारीले स्थानीय भानमती धारामा स्नान गरी आएपछि पूजाआजा र अन्य धार्मिक विधिसहित जात्रा शुभारम्भ गर्ने परम्परा रहेको छ।
जात्रामा छिमेकी मेलौली नगरपालिका, शिवनाथ गाउँपालिका र पञ्चेश्वर गाउँपालिकाबाट दमाहा बजाउँदै विभिन्न समूह आउने गरेका छन्। त्यसैगरी पाटन नगरपालिका, दशरथचन्द नगरपालिका, डडेल्धुराको अजयमेरु तथा भागेश्वर गाउँपालिकासहित भारतको उत्तराखण्ड राज्यबाट समेत ठूलो सङ्ख्यामा श्रद्धालु तथा दर्शनार्थी सहभागी हुने गरेका छन्।
शिवनाथ मन्दिरमा असोज र चैतको नवरात्रसँगै असार तथा साउन महिनामा पनि विभिन्न धार्मिक मेला लाग्ने गर्दछ। तर कात्तिक शुक्ल सप्तमी र अष्टमीका दिन लाग्ने जात्रा विशेष महत्त्वको मानिन्छ। यस अवसरमा खेलिने परम्परागत छालाको गिर खेलका कारण मेलामा दर्शनार्थीको बढी भीड लाग्ने गरेको छ।
शिवनाथ गाउँपालिका–५ कफाडीबाट सामूहिक देउरोसहित छालाबाट बनेको भकुन्डो (गिर) खेल्दै जात्रामा सहभागी हुने परम्परा रहेको छ। सामूहिक रूपमा गिर खेल्दै जाने दृश्य जात्राको मुख्य आकर्षण बन्ने गरेको वडा नम्बर ५ का अध्यक्ष केशवबहादुर चन्दले बताए।
जात्राका अवसरमा स्थानीय उत्पादन तथा परम्परागत वस्तुको व्यापारसमेत हुने गर्दछ। मेलामा स्थानीय खानाका परिकार, बाँस तथा चोयाबाट निर्मित डोको, डालो र कृषि प्रयोजनका हँसिया, कुटो, कोदालोलगायत सामग्रीको किनबेच हुने गरेको छ।
धार्मिक आस्था, मौलिक संस्कृति र परम्परासँग जोडिएको शिवनाथ जात्राले स्थानीय कला, संस्कार र सामाजिक सद्भावको संरक्षणमा समेत महत्त्वपूर्ण योगदान पुर्याउँदै आएको छ।
Discussion about this post