काठमाडौं । नेपाल प्रिमियर लिग (एनपीएल) को तेस्रो संस्करणअन्तर्गत १९औँ खेलमा पोखरा एभेन्जर्सले कर्णाली याक्सलाई २१८ रनको विशाल लक्ष्य दिएको छ। ओपनर युवराज समराको शतकीय पारी र कुशल भुर्तेलको अर्धशतकको मद्दतमा पोखराले निर्धारित २० ओभरमा ३ विकेट गुमाउँदै २१७ रन बनाएको हो।
त्रिवि क्रिकेट स्टेडियममा टस जितेर पहिले ब्याटिङ गरेको पोखराका लागि युवराजले सर्वाधिक १०२ रन बनाए। उनले ४८ बलमा १० चौका र ६ छक्का प्रहार गर्दै उत्कृष्ट शतकीय पारी खेले।
युवराज र कुशल भुर्तेलबीच दोस्रो विकेटका लागि १३६ रनको महत्त्वपूर्ण साझेदारी भएको थियो। कुशलले ३९ बलमा ७ छक्कासहित ६२ रन बनाए। पोखराका मेहेदी हसन ५ रनमा आउट भए भने सन्नी विक ३ र कप्तान चमिका करुणारत्ने ३५ रनमा अविजित रहे।
कर्णाली याक्सका कप्तान सोमपाल कामीले २ तथा मार्क वाटले १ विकेट लिए।
पोखराले बनाएको २१७ रन यस संस्करणको हालसम्मकै उच्च योगफल हो। पोखरा र कर्णाली दुवैका लागि यो पाँचौँ खेल हो।
यसअघिका चार खेलमा लगातार हार बेहोरेको पोखरा पहिलो जितको खोजीमा छ। आजको खेलमा पनि पराजित भए पोखरा आधिकारिक रूपमा प्लेअफ दौडबाट बाहिरिने पहिलो टोली बन्नेछ।
पोखराले पहिलो खेलमा सुदूरपश्चिम रोयल्ससँग ६ विकेट, दोस्रो खेलमा जनकपुर बोल्ट्ससँग ९ रन, तेस्रो खेलमा लुम्बिनी लायन्ससँग ८ विकेट र चौथो खेलमा चितवन राइनोजसँग ३० रनले हार बेहोरेको थियो।
यता कर्णाली याक्सले सुरुवाती दुई खेलमा जित निकाले पनि पछिल्ला दुई खेलमा पराजय भोगेको छ। कर्णालीले पहिलो खेलमा जनकपुर बोल्ट्सलाई १९ रन र दोस्रो खेलमा विराटनगर किंग्सलाई ४ विकेटले हराएको थियो। तर, तेस्रो खेलमा काठमाडौं गोर्खाजसँग ४ विकेट र चौथो खेलमा सुदूरपश्चिम रोयल्ससँग ३९ रनले पराजित भएको थियो।
Discussion about this post