काठमाडौं — बङ्गलादेशका अलराउन्डर मेहदी हसनले नेपाल प्रिमियर लिग (एनपीएल) को तेस्रो संस्करण पोखरा एभेन्जर्सबाट खेल्ने भएका छन्।
पोखरा एभेन्जर्सले हिजो सामाजिक सञ्जालमार्फत मेहदीलाई टोलीमा अनुबन्ध गरेको जानकारी दिएको हो। टी–२० अन्तर्राष्ट्रिय क्रिकेटमा प्रभावशाली प्रदर्शन गर्दै आएका मेहदी बलिङ र ब्याटिङ दुवैमा योगदान दिन सक्ने खेलाडी हुन्।
३१ वर्षीय मेहदीले बङ्गलादेशका लागि ७८ टी–२० अन्तर्राष्ट्रिय र १२ एकदिवसीय अन्तर्राष्ट्रिय खेल खेलेका छन्। उनले टी–२० अन्तर्राष्ट्रियमा ७८ तथा एकदिवसीय अन्तर्राष्ट्रियमा १५ विकेट लिएका छन्। उनले बङ्गलादेश प्रिमियर लिगमा पनि विभिन्न ६ टोलीबाट खेलिसकेका छन्।
एनपीएल मेहदीको पहिलो विदेशी लिग हुने समाचारमा उल्लेख छ। पोखरा एभेन्जर्सले यसअघि बङ्गलादेशका पूर्वकप्तान शाकिब अल हसनलाई पनि टोलीमा अनुबन्ध गरिसकेको छ।
एनपीएलको तेस्रो संस्करण यही कात्तिक ९ गतेदेखि काठमाडौंमा सुरु हुँदैछ।
Discussion about this post