भक्तपुर। मध्यपुर थिमिस्थित नेपाल–कोरियामैत्री नगरपालिका अस्पतालमा १५ शय्याको मोडुलर आईसीयू सेवा सञ्चालनमा आएको छ। बिहीबार आयोजित कार्यक्रममा अस्पतालका अध्यक्ष एवं मध्यपुर थिमि नगरपालिकाका प्रमुख सुरेन्द्र श्रेष्ठले उक्त सेवाको उद्घाटन गरेका हुन्।
उद्घाटन कार्यक्रममा नगरप्रमुख श्रेष्ठले निर्वाचनका बेला गरिएको प्रतिबद्धताअनुसार अस्पतालको सेवा र पूर्वाधार विस्तार गरिएको बताए। पछिल्लो चार वर्षमा अस्पतालमा सिटी स्क्यान, ब्लड बैंक, डायलासिस र मोडुलर आईसीयू सेवा सञ्चालनमा ल्याइएको उल्लेख गर्दै उनले छिट्टै मुटुरोग उपचार सेवा पनि सुरु गर्ने जानकारी दिए।
नगरपालिकाका उपप्रमुख विजयकृष्ण श्रेष्ठले मोडुलर आईसीयू सेवा सञ्चालनसँगै सघन उपचार आवश्यक पर्ने बिरामीलाई अन्य अस्पतालमा पठाउनुपर्ने बाध्यता कम हुने बताए। विगतमा आर्थिक समस्यामा रहेको अस्पताल अहिले सेवा विस्तारसँगै सुधार हुँदै गएको उनको भनाइ थियो।
जिल्ला जनस्वास्थ्य कार्यालयकी प्रमुख अञ्जना खड्काले नगर अस्पतालमै सघन उपचार सेवा उपलब्ध हुनु स्वास्थ्य सेवामा नागरिकको पहुँच विस्तारका लागि महत्वपूर्ण भएको बताइन्।
अस्पतालका कार्यकारी निर्देशक डा. डिके रोशनका अनुसार आधुनिक उपकरणसहितको मोडुलर आईसीयूले बिरामीको उपचारलाई व्यवस्थित बनाउनुका साथै संक्रमणको जोखिम न्यूनीकरणमा सहयोग पुर्याउँछ। उनका अनुसार सरकारी अस्पतालमध्ये भक्तपुर जिल्लामा मोडुलर आईसीयू सेवा सञ्चालन गर्ने यो पहिलो अस्पताल हो।
नगरपालिकाका प्रमुख प्रशासकीय अधिकृत भोजराज घिमिरेका अनुसार दुई करोड २८ लाख रुपैयाँको लागतमा स्थापना गरिएको मोडुलर आईसीयूमा १५ शय्या रहेका छन्। अस्पताल प्रशासन अधिकृत रुपेश श्रेष्ठका अनुसार अस्पतालको बहिरंग सेवामा दैनिक औसत एक हजार दुई सय बिरामी आउने गरेका छन्।
यसैबीच, दक्षिण कोरिया सरकारमार्फत कोरिया अन्तर्राष्ट्रिय सहयोग नियोग (कोइका) को आर्थिक सहयोगमा अस्पतालको सुविधासम्पन्न भवन निर्माण भइरहेको छ। उक्त भवन निर्माणमा करिब एक अर्ब २५ करोड रुपैयाँ लागत लाग्ने जनाइएको छ।
Discussion about this post