काठमाडौं — साताको कारोबारको दोस्रो दिन मंगलबार सेयर बजारमा सामान्य सुधार देखिएको छ। नेपाल स्टक एक्सचेन्ज (नेप्से) परिसूचक ४.१२ अंकले बढेर २ हजार ५९९.९३ विन्दुमा बन्द भएको हो।
सोमबार नेप्से ४ अंकले बढेर २ हजार ५९५.८१ विन्दुमा पुगेको थियो। परिसूचकमा सामान्य वृद्धि देखिए पनि कारोबार रकम भने बढेको छ। सोमबार ४ अर्ब ४६ करोड रुपैयाँको कारोबार भएकोमा मंगलबार ४ अर्ब ७३ करोड ६९ लाख रुपैयाँभन्दा बढीको सेयर किनबेच भएको छ।
यस दिन ३५१ वटा स्क्रिप्सका १ करोड ३५ लाख ५३ हजार ९७ कित्ता सेयर कारोबार भएका छन्। कारोबारमा आएका कम्पनी तथा स्क्रिप्समध्ये १०४ वटाको मूल्य बढ्दा १६७ वटाको घटेको छ भने ७ वटाको मूल्य स्थिर रहेको छ।
मंगलबार सगरमाथा जलविद्युत् कम्पनीको सेयर मूल्य सर्वाधिक १२.४४ प्रतिशतले बढेको छ। यता स्नो रिभर्सको सेयर मूल्य १५ प्रतिशतले घट्दा धौलागिरी लघुवित्तको १२.८७ प्रतिशत र एनआईसी एसिया सेलेक्ट फन्ड ३० को ५.२३ प्रतिशतले घटेको छ।
कारोबार रकमका आधारमा घलेम्यादी हाइड्रो शीर्ष स्थानमा रहेको छ। कम्पनीको ३६ करोड रुपैयाँ बराबरको सेयर कारोबार भएको छ। माउन्टेन इनर्जी नेपाल र कुमारी बैंकको २५–२५ करोड रुपैयाँ बराबरको कारोबार हुँदा रिलायन्स स्पिनिङ मिल्सको १२ करोड र लक्ष्मी सनराइज बैंकको १० करोड रुपैयाँ बराबरको सेयर किनबेच भएको छ।
समूहगत रूपमा बैंकिङ, विकास बैंक, लगानी, जीवन बिमा र निर्जीवन बिमा समूहका उपसूचक बढेका छन् भने अन्य समूहका उपसूचक घटेका छन्।
Discussion about this post