काठमाण्डौ — भारतीय महिला क्रिकेट टोलीकी अनुभवी कप्तान हरमनप्रीत कौरले तीनवटै अन्तर्राष्ट्रिय फर्म्याटको कप्तानीबाट राजीनामा दिएकी छिन्। कप्तानी छाडे पनि उनले खेलाडीका रूपमा क्रिकेटलाई निरन्तरता दिने बताएकी छिन्।
३७ वर्षीया कौरले सामाजिक सञ्जालमार्फत कप्तानीबाट अलग हुने घोषणा गरेकी हुन्। उनको नेतृत्वमा भारतले घरेलु मैदानमा पहिलो पटक आईसीसी महिला एकदिवसीय विश्वकपको उपाधि जितेको थियो।
कौरले सन् २०१६ मा भारतीय टी–२० टोलीको कप्तानी सम्हालेकी थिइन्। त्यसपछि सन् २०२२ मा उनले एकदिवसीय र टेस्ट टोलीको नेतृत्वसमेत सम्हालिन्। करिब एक दशक लामो कप्तानी यात्रामा उनले भारतीय महिला क्रिकेट टोलीलाई विभिन्न अन्तर्राष्ट्रिय प्रतियोगितामा नेतृत्व गरिन्।
कौरको कप्तानीमा भारतले एसियाली खेलकुदमा पनि स्वर्ण पदक जितेको थियो। उनको नेतृत्वमा भारतले १९औँ संस्करणको एसियाली खेलकुदमा स्वर्ण जितेको थियो भने जापानमा भएको २०औँ संस्करणको एसियाली खेलकुदमा पनि टोलीले स्वर्ण पदक हासिल गरेको थियो।
सन् २००९ मा भारतका लागि टी–२० र एकदिवसीय अन्तर्राष्ट्रियमा डेब्यु गरेकी कौरको कप्तानका रूपमा समेत उत्कृष्ट यात्रा रह्यो। उनले भारतका लागि ५ टेस्ट, ५१ एकदिवसीय र १५५ टी–२० अन्तर्राष्ट्रियमा कप्तानी गरेकी छिन्।
कौर १५० भन्दा बढी टी–२० अन्तर्राष्ट्रिय खेलमा कप्तानी गर्ने पहिलो पुरुष वा महिला क्रिकेटरसमेत बनेकी छिन्।
यसैबीच, सन् २०२२ देखि भारतीय टोलीको उपकप्तान रहँदै आएकी स्मृति मन्धना नयाँ कप्तानका लागि प्रमुख दाबेदारका रूपमा देखिएकी छिन्।
Discussion about this post