काठमाण्डौ । चितवनका उद्योगी व्यवसायीले नारायणी नदीको कटान र बाढीका कारण जोखिममा परेको नारायणगढ बजारसहित आसपासका क्षेत्रको संरक्षणका लागि तत्काल पहल गर्न राष्ट्रिय स्वतन्त्र पार्टी (रास्वपा)का सभापति रवि लामिछानेसँग आग्रह गरेका छन्।
उद्योग वाणिज्य सङ्घ चितवनको टोलीले लामिछानेलाई भेटेर नारायणी नदीको दीर्घकालीन व्यवस्थापन, प्रभावकारी तटबन्ध निर्माण तथा बजार संरक्षणका लागि आवश्यक पहल गर्न माग गरेको हो।
चितवन क्षेत्र नम्बर–२ का प्रतिनिधिसभा सदस्यसमेत रहेका लामिछानेलाई भेटेर नारायणी नदी नियन्त्रण र नारायणगढ बजार संरक्षणका विषयमा ध्यानाकर्षण गराइएको सङ्घका अध्यक्ष चिरञ्जीवी सुवेदीले जानकारी दिए।
नदीको निरन्तर कटान र बाढीका कारण नारायणगढ बजार तथा आसपासका बस्ती र व्यापारिक क्षेत्र जोखिममा पर्दै गएको भन्दै व्यवसायीले दीर्घकालीन समाधानका लागि सरकारको तत्काल ध्यानाकर्षण हुनुपर्ने बताएका छन्।
व्यवसायीको आग्रहपछि सभापति लामिछानेले सम्बन्धित मन्त्री तथा सरकारी निकायसँग समन्वय गरी प्राविधिक अध्ययनपछि प्रभावकारी तटबन्ध निर्माण र नदी व्यवस्थापनको काम अघि बढाउने प्रतिबद्धता जनाएका छन्।
लामिछानेले छिट्टै प्राविधिक टोली पठाएर स्थलगत अध्ययन गराउने र अध्ययनका आधारमा आवश्यक काम अघि बढाउने आश्वासन दिएको अध्यक्ष सुवेदीले बताए।
Discussion about this post