काठमाडौं । नेपाली कांग्रेसको १५औँ महाधिवेशन आजदेखि काठमाडौंमा सुरु हुँदैछ। महाधिवेशनको उद्घाटन समारोह दिउँसो २ बजे खुलामञ्चमा हुने तय गरिएको छ।
महाधिवेशनमा देशभरबाट ७ हजारभन्दा बढी प्रतिनिधि सहभागी हुने कांग्रेसले जनाएको छ। उद्घाटन समारोहपछि बन्दसत्र तथा अन्य कार्यक्रम सञ्चालन हुनेछन् भने असोज २१ र २२ गते नयाँ नेतृत्व चयनका लागि निर्वाचन गर्ने कार्यतालिका छ।
महाधिवेशनको मुख्य आकर्षण नयाँ केन्द्रीय नेतृत्व चयन रहेको छ। सभापति, उपसभापति, महामन्त्री, सहमहामन्त्रीसहित केन्द्रीय सदस्य पदका लागि प्रतिस्पर्धा हुनेछ। सहमहामन्त्रीका ११ पदमा पनि विभिन्न नेताहरूले आकांक्षा प्रस्तुत गरिरहेका छन्।
कांग्रेस विधानअनुसार महाधिवेशनबाट २४० सदस्यीय केन्द्रीय कार्यसमिति चयन हुने व्यवस्था छ। त्यसमध्ये १७१ जना पदाधिकारी तथा केन्द्रीय सदस्य निर्वाचनबाट चयन हुने र बाँकी सदस्य सभापतिले मनोनयन गर्ने व्यवस्था रहेको छ।
यसपटकको महाधिवेशनमा नेतृत्व पुस्तान्तरणसँगै पार्टीको भावी नीति, संगठन सुदृढीकरण र आन्तरिक एकताको विषयसमेत प्रमुख बहसका रूपमा उठेको छ। ३५ वर्षमुनिका युवाको केन्द्रीय प्रतिनिधित्व सुनिश्चित गर्ने विषयमा पनि विधान संशोधनमार्फत छलफल अघि बढाइएको छ।
विशेष महाधिवेशनबाट नेतृत्व परिवर्तन भएपछि कांग्रेसभित्र देखिएको आन्तरिक विवादका बीच नियमित महाधिवेशन हुन लागेको हो। पूर्वसभापति शेरबहादुर देउवा नेतृत्वको समूहले विशेष महाधिवेशनबाट भएका निर्णयप्रति असहमति जनाउँदै कानुनी प्रक्रिया अघि बढाएको थियो। यद्यपि नियमित महाधिवेशनको प्रक्रिया अघि बढेसँगै देउवा समूहले पनि संगठनात्मक तयारी तीव्र पारेको छ।
कांग्रेसले महाधिवेशनका लागि करिब ७ लाख ८३ हजार ८ सय ३६ क्रियाशील सदस्य कायम गरेको विवरण सार्वजनिक गरेको छ। महाधिवेशनमा विदेशी प्रतिनिधिलाई समेत आमन्त्रण गरिएको छ।
प्रतिनिधिका लागि भृकुटीमण्डपमा महाधिवेशन अवधिभर बिहान र दिउँसोको खानाको व्यवस्था गरिएको छ। उद्घाटनदेखि नेतृत्व चयनसम्मका कार्यक्रमले कांग्रेसको आगामी राजनीतिक दिशा र संगठनात्मक प्राथमिकता निर्धारण गर्ने अपेक्षा गरिएको छ।
Discussion about this post