सुदूरपश्चिममा तीन दिनसम्म वर्षाको सम्भावना, भारी वर्षा हुने क्षेत्रमा सतर्कता अपनाउन आग्रह

सुदूरपश्चिम । सुदूरपश्चिम प्रदेशका कैलालीसहित विभिन्न जिल्लामा वर्षा भइरहेको छ। आगामी तीन दिनसम्म प्रदेशका अधिकांश भू–भागमा वर्षाको सम्भावना रहेको जल तथा मौसम विज्ञान कार्यालय, अत्तरियाले जनाएको छ।

कार्यालय प्रमुख इञ्जिनियर सञ्जयकुमार साहका अनुसार मौसम पूर्वानुमानअनुसार आजदेखि २४ गतेसम्म सुदूरपश्चिमका हिमाल, पहाड र तराई क्षेत्रमा मौसम सामान्यतया बदली रहनेछ। यस अवधिमा विभिन्न स्थानमा मेघगर्जन र चट्याङसहित मध्यम वर्षा हुने सम्भावना रहेको छ।

आज पहाडी तथा तराई भू–भागका केही स्थानमा भारी वर्षा हुनसक्ने भएकाले सम्भावित बाढी, पहिरो तथा डुबानको जोखिमलाई मध्यनजर गर्दै आवश्यक सतर्कता अपनाउन कार्यालयले आग्रह गरेको छ।

कार्यालय प्रमुख साहका अनुसार आज दिउँसो हिमाली क्षेत्रमा थोरै तथा पहाडी र तराई क्षेत्रमा अधिकांश स्थानमा मेघगर्जनसहित वर्षाको सम्भावना छ। रातिको समयमा हिमाली क्षेत्रमा थोरै तथा पहाडी र तराईका केही स्थानमा मध्यम वर्षा हुनसक्नेछ। पहाडी तथा तराईका एक–दुई स्थानमा भने भारी वर्षा हुनसक्ने पूर्वानुमान गरिएको छ।

यस्तै, मङ्गलबार वर्षाको दायरा केही घट्ने भए पनि मौसम पूर्णरूपमा खुल्ने छैन। हिमाली तथा पहाडी क्षेत्रका थोरैदेखि धेरै स्थान र तराईका केही स्थानमा मेघगर्जन तथा चट्याङसहित मध्यम वर्षा हुने सम्भावना छ। मङ्गलबार राति भने तीनै भू–भागका थोरै स्थानमा मध्यम वर्षा हुनसक्ने कार्यालयले जनाएको छ।