कञ्चनपुर – भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलले भूमिसम्बन्धी समस्या समाधानका लागि सङ्घ, प्रदेश र स्थानीय तहबीच प्रभावकारी समन्वय आवश्यक रहेको बताउनुभएको छ। कञ्चनपुरको दोधारा चाँदनी नगरपालिकामा आयोजित कार्यक्रममा बोल्दै मन्त्री रावलले भूमिहीन, सुकुम्बासी तथा अव्यवस्थित बसोबासीका समस्या समाधानलाई सरकारले उच्च प्राथमिकतामा राखेको बताउनुभयो। उहाँले समस्या समाधानका लागि स्थानीय र प्रदेश सरकारको सक्रिय सहयोग आवश्यक रहेको स्पष्ट पार्नुभयो।
“एउटा सरकारले सहयोग नगर्दा पूरै पालिकामा सुकुम्बासीको लालपूर्जा वितरण रोकिन सक्छ,” मन्त्री रावलले भन्नुभयो। उहाँले स्थानीय तहमा देखिएका समस्या पहिचान गरी आवश्यक नीतिगत सुधारका लागि छलफल भइरहेको जानकारी दिनुभयो। पीडितका समस्या समयमै सम्बन्धित निकायसम्म पुग्न नसक्दा समाधान प्रक्रिया लम्बिएको उल्लेख गर्दै उहाँले भूमिसम्बन्धी समस्या राजनीतिक आस्थाभन्दा माथि उठेर समाधान गर्नुपर्नेमा जोड दिनुभयो। “पीडितका हकमा जुनसुकै दलमा आस्था राख्ने भए पनि हामी एक ठाउँमा हुनुपर्छ,” उहाँले भन्नुभयो।
मन्त्री रावलले भूमिसम्बन्धी समस्या समाधानमा सरकारले न्यायोचित निर्णय गर्ने प्रतिबद्धता व्यक्त गर्दै पीडितहरूलाई समस्या समाधान हुनेमा ढुक्क रहन आग्रह गर्नुभयो। यसै क्रममा मन्त्री रावलले जिल्ला प्रशासन कार्यालय कञ्चनपुरमा भूमि प्रशासन कार्यालय, नापी कार्यालय तथा विभिन्न स्थानीय तहका प्रमुखहरूसँग भूमिसम्बन्धी समस्या समाधानका विषयमा छलफल गर्नुभएको थियो। मन्त्री रावलले महेन्द्रनगरस्थित निर्माणाधीन मझगाउँ विमानस्थल तथा दोधारा चाँदनीमा निर्माणाधीन सुक्खा बन्दरगाहको समेत स्थलगत अवलोकन गर्नुभएको छ।
Discussion about this post