काठमाडौं – नेपाल चेम्बर अफ कमर्स (एनसीसी) र गैरआवासीय नेपाली सङ्घ (एनआरएनए) बीच नेपालमा लगानी प्रवर्द्धन, व्यापार विस्तार तथा आर्थिक सहकार्यलाई अघि बढाउने समझदारी भएको छ। काठमाडौंमा आयोजित कार्यक्रममा एनसीसीका अध्यक्ष कमलेश अग्रवाल र एनआरएनएका अध्यक्ष डा. हेमराज शर्माले समझदारीपत्रमा हस्ताक्षर गर्नुभएको हो।
समझदारीअनुसार नेपालमा प्रत्यक्ष वैदेशिक लगानी भित्र्याउन सहजीकरण गर्ने, व्यापार तथा उद्योगको विस्तार, उद्यमशीलता विकास र स्वदेशी तथा गैरआवासीय नेपाली व्यवसायीबीच सहकार्य बढाउने विषयलाई प्राथमिकता दिइनेछ। दुवै संस्थाले संयुक्त रूपमा लगानी सम्मेलन, रोड-शो, व्यापारिक शिखर सम्मेलन तथा व्यावसायिक कार्यक्रम आयोजना गर्ने भएका छन्। यस्ता कार्यक्रममार्फत विदेशी तथा गैरआवासीय नेपाली लगानीकर्ता र नेपाली व्यवसायीबीच प्रत्यक्ष सम्पर्क तथा लगानी साझेदारीको वातावरण निर्माण गरिनेछ।
समझदारीमा निर्यातमुखी उद्योगको प्रवर्द्धनसँगै साना तथा मझौला उद्यम र स्टार्टअपलाई सहयोग गर्ने तथा तालिम, कार्यशाला र सेमिनारमार्फत व्यवसायिक क्षमता अभिवृद्धि गर्ने विषय पनि समेटिएको छ। एनसीसी अध्यक्ष अग्रवालले समझदारीले गैरआवासीय नेपालीको पूँजी नेपालमा भित्र्याउन सहज वातावरण निर्माण गर्ने विश्वास व्यक्त गर्नुभयो। उहाँले आर्थिक नीति तथा कानुनी संरचनामा स्थिरता र स्पष्टता आवश्यक रहेको बताउँदै समझदारी कागजमा सीमित नभई लगानी, रोजगारी र आर्थिक रूपान्तरणमा प्रत्यक्ष परिणाम देखिने गरी कार्यान्वयन हुनुपर्नेमा जोड दिनुभयो।
एनआरएनए अध्यक्ष डा. शर्माले नेपालमा लगानी भित्र्याउन विद्यमान कानुनी तथा नीतिगत जटिलता हटाउनुपर्ने बताउनुभयो। विश्वभर रहेका नेपालीको पूँजीसँगै सीप, ज्ञान र अनुभवलाई नेपालको विकाससँग जोड्ने अभियानलाई प्राथमिकताका साथ अघि बढाइने उहाँको भनाइ छ। दुवै संस्थाले लगानी तथा व्यवसायिक वातावरण सुधारका लागि आवश्यक नीतिगत सुधारको सिफारिस गर्नुका साथै सरकार र सम्बन्धित सरोकारवालासँग संयुक्त रूपमा संवाद तथा समन्वय गर्ने समझदारीसमेत गरेका छन्।
Discussion about this post