महेन्द्रनगर। सरकारले नेपाल प्रज्ञा प्रतिष्ठानको प्राज्ञ सदस्यमा कञ्चनपुरका २ जनालाई मनोनित गरेको छ। प्रधानमन्त्री वालेन्द्र शाह (बालेन)ले कञ्चनपुरका श्यामसुन्दर ढकाल र खड्ककुमार गिरीलाई प्रतिष्ठानको प्राज्ञ सदस्यमा मनोनित गरेका हुन्। ढकाल महेन्द्रनगरस्थित नेपाल संस्कृत विश्वविद्यालय, शारदा विद्यापीठका सह-प्राध्यापक हुन्।
प्राज्ञ सदस्यमा मनोनित भएपछि उनले नेपाल सरकार, संस्कृति, पर्यटन तथा नागरिक उड्डयन मन्त्रालय एवं शुभचिन्तकहरूप्रति हार्दिक आभार व्यक्त गरेका छन्। ‘मेरो यो नियुक्ति निःस्वार्थ भावले आजीवन साहित्य साधनामा समर्पित रहँदै २ दर्जनभन्दा बढी विशिष्ट ग्रन्थ लेखन–प्रकाशन गर्नुहुने मेरा प्रेरणाका स्रोत वैकुण्ठवासी पूजनीय पिताजी साहित्यकार चूडामणि शास्त्री ढकालज्यूप्रति सादर समर्पित छ,’ उनले सामाजिक सञ्जाल फेसबुकमा लेखेका छन्। नेपाल प्रज्ञा प्रतिष्ठानमा सुदूरपश्चिमबाट कञ्चनपुरका ढकाल र गिरीसहित कैलालीका किरण पौडेल, मोहित जोशी, हरिप्रिया श्रेष्ठ तथा डोटीका हेमन्त जोशी गरी ६ जना प्राज्ञ सदस्य मनोनित भएका छन्। यसैगरी, नेपाल संगीत तथा नाट्य प्रज्ञा प्रतिष्ठानको प्राज्ञ सदस्यमा कञ्चनपुरकी रेखाकुमारी जोशी मनोनित भएकी छन्।
सरकारले उक्त प्रतिष्ठानमा २४ जना प्राज्ञ सदस्य मनोनित गर्दा जोशी सुदूरपश्चिमबाट प्रतिनिधित्व गर्ने एक्ली सदस्य हुन्। त्यस्तै, नेपाल ललितकला प्रज्ञा प्रतिष्ठानमा २४ जना प्राज्ञ सदस्य मनोनित हुँदा सुदूरपश्चिमबाट कैलालीका दीपक आउजी मात्र मनोनित भएका छन्। ३ वटै प्रज्ञा प्रतिष्ठानमा सुदूरपश्चिमबाट कञ्चनपुरका ३, कैलालीका ४ र डोटीका १ गरी ८ जना प्राज्ञ सदस्य मनोनित भएका छन्।
Discussion about this post