आज १९ औं गणतन्त्र दिवस, विभिन्न कार्यक्रम गरी देशभर मनाइँदै छ।
तत्कालीन नेकपा माओवादीले चलाएको १० वर्षे सशस्त्र युद्धको जगमा २०६२-०६३ मा भएको जनआन्दोलनले शाहवंशीय राजतन्त्र अन्त्य गर्दै गणतन्त्र स्थापना भएको १८ वर्ष पुगेर १९ वर्षमा लागेको अवसरमा विभिन्न कार्यक्रम गरी मनाउन लागेको हो।
दिवसको अवसरमा सरकारले सार्वजनिक बिदा दिएको छ। जननिर्वाचित पहिलो संविधानसभाबाट २०६५ जेठ १५ गते राजतन्त्रको विधिवत् अन्त्य गर्दै नेपालमा संघीय लोकतान्त्रिक गणतन्त्रात्मक शासन व्यवस्था प्रारम्भको घोषणा भएको दिनलाई गणतन्त्र दिवसको रूपमा मनाउने गरिएको छ।
दिवसको अवसरमा सैनिक मञ्च टुँडीखेलमा आज विशेष समारोह भइरहेको छ। सममहरोहमा राष्ट्रपति रामचन्द्र पौडेल र प्रधानमन्त्री बालेन्द्र शाह समेत उपस्थित भएका छन्। अहिले समहरोह चलिरहेको छ। समारोहलाई सम्वोधन भने राष्ट्रपति पौडेलले गर्नेछन्। अघिल्ला वर्षहरुमा राष्ट्रपति सहभागी भए पनि प्रधानमन्त्रीले सम्बोधन गर्ने परम्परा थियो। तर यस वर्ष प्रधानमन्त्री बालेन्द्र शाहले सम्बोधन नगर्ने भएका हुन्।
उनले गणतन्त्रको प्रतीक राष्ट्रपति भएकाले राष्ट्रपतिलाई नै सम्बोधन गर्न अनुरोध गरेर पत्र शीतल निवासमा पठाएका थिए। सोही अनुसार राष्ट्रपतिले सम्बोधन गर्ने तय भएको हो। गणतन्त्र दिवसको अवसरमा राष्ट्रपति, उपराष्ट्रपति, राजनेतीक दलका नेताहरुले शुभकामाना दिएका छन्।
राष्ट्रपति पौडेलले सङ्घीय लोकतान्त्रिक गणतन्त्रात्मक शासन व्यवस्थाको माध्यमबाट उत्तरदायी र जनमुखी सेवा प्रवाहलाई सुदृढ बनाउँदै सुशासन, विकास र समृद्धिको लक्ष्य प्राप्ति आजको राष्ट्रिय आवश्यकता भएको बताएका छन्।
Discussion about this post