कञ्चनपुर । अत्यधिक गर्मी र तातो हावा (लू) का कारण तापक्रम बढ्दै गएपछि सर्वसाधारणको सहजताका लागि कञ्चनपुरको दोधारा चाँदनी नगरपालिकाका विभिन्न स्थानमा चिसो कागती पानी वितरण सुरु गरिएको छ ।
घर बाहिर विभिन्न कामले निस्कने नागरिकलाई गर्मीका कारण खानेपानीको समस्या हुन थालेपछि नेपाल राष्ट्रिय समाज कल्याण संघ (एनएनएसडब्लुए) अन्तर्गत सञ्चालन भइरहेको ‘समुदायका लागि जलवायु उत्थानशील परियोजना’ (सिआरसी) तथा केही स्थानीय व्यक्तिहरूको सहकार्यमा चिसो कागती पानी वितरण अभियान सुरु गरिएको बताइएको छ ।
परियोजनाका कार्यक्रम संयोजक महेश घिमिरे का अनुसार अत्यधिक गर्मीका कारण सामाजिक सुरक्षा भत्ता लिन आउने ज्येष्ठ नागरिक तथा अन्य स्थानीयवासीलाई लक्षित गरी कागती पानी वितरण थालिएको हो ।
उहाँले गर्मी बढ्दै गइरहेको अवस्थामा सामाजिक सुरक्षा भत्ता वितरण स्थल तथा दोधारा चाँदनी नगरपालिकाका भिडभाड हुने क्षेत्रहरूमा सर्वसाधारणको स्वास्थ्यलाई ध्यानमा राख्दै चिसो पानी वितरणसँगै गर्मीबाट बच्ने सचेतनामूलक कार्यक्रमलाई पनि निरन्तरता दिइने जानकारी दिनुभयो ।
Discussion about this post