काठमाण्डौ । जिल्ला प्रशासन कार्यालय जुम्लाले सेवाग्राहीलाई सहज सेवा प्रदान गर्ने उद्देश्यले हुलाकमार्फत घरमै राहदानी पुर्याउने सेवा सुरु गरेको छ ।
जिल्लाका आठवटै पालिकामा हालसम्म १४९ थान राहदानी सेवाग्राहीको घरमै पुगेर वितरण गरिएको जिल्ला प्रशासन कार्यालय जुम्लाका राहदानी शाखा प्रमुख नरबहादुर बुढाले जानकारी दिनुभयो ।
जिल्ला प्रशासन कार्यालय र हुलाक कार्यालय जुम्लाबीच भएको सम्झौताअनुसार गत वैशाख २४ गते पहिलो चरणमा ६१ थान राहदानी हल्कारामार्फत सेवाग्राहीको घरमै पुर्याइएको थियो । त्यसपछि वैशाख २८ गते १९ वटा र जेठ ५ गते २५ वटा राहदानी वितरण गरिएको जनाइएको छ ।
गत चैत १३ गते सरकारले स्वीकृत गरेको शासकीय सुधारसम्बन्धी १०० दिने कार्यसूचीअन्तर्गत पहिलो पटक जिल्लामा यस्तो सेवा सुरु गरिएको प्रमुख जिल्ला अधिकारी दीपक पौडेलले बताउनुभयो ।
राहदानी वितरणका क्रममा सेवाग्राहीले नागरिकता, राष्ट्रिय परिचयपत्र वा मतदाता नामावलीजस्ता आधिकारिक परिचय खुल्ने कागजात अनिवार्य रूपमा साथमा राख्नुपर्नेछ ।
जिल्ला हुलाक कार्यालयका अनुसार हल्कारामार्फत राहदानी बढीमा तीन दिनभित्र सुरक्षित रूपमा सम्बन्धित व्यक्तिको घरमै पुर्याइने व्यवस्था गरिएको छ ।
Discussion about this post