काठमाडौं – नेपाल आयल निगम ले इन्धनको नयाँ मूल्यसूची सार्वजनिक गर्दै पेट्रोल, डिजेल तथा मट्टितेलको भाउ घटाएको छ भने खाना पकाउने एलपी ग्यासको मूल्य बढाएको छ। नयाँ मूल्य गएराति १२ बजेदेखि लागू भएको हो। निगमका अनुसार पेट्रोलमा प्रतिलिटर २ रुपैयाँ तथा डिजेल र मट्टितेलमा प्रतिलिटर १२ रुपैयाँले मूल्य घटाइएको छ। यससँगै काठमाडौं उपत्यका, दिपायल र पोखरामा पेट्रोलको मूल्य प्रतिलिटर २१७ रुपैयाँ कायम भएको छ। यसअघि यहाँ पेट्रोलको मूल्य २१९ रुपैयाँ थियो।
त्यस्तै सुर्खेत र दाङमा पेट्रोलको मूल्य २१६ रुपैयाँ कायम भएको छ भने चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्जमा प्रतिलिटर २१४ रुपैयाँ तोकिएको छ।
यता, खाना पकाउने एलपी ग्यासको मूल्य भने १५० रुपैयाँले वृद्धि गरिएको छ। अब ग्यासको मूल्य प्रतिसिलिन्डर २ हजार १६० रुपैयाँ पुगेको छ भने आधा सिलिन्डरको मूल्य १ हजार ८० रुपैयाँ कायम गरिएको छ। यसअघि पूरा सिलिन्डरको मूल्य २ हजार १० र आधा सिलिन्डरको १ हजार ५ रुपैयाँ थियो।
निगमका अनुसार हवाई इन्धनमा पनि वृद्धि गरिएको छ। आन्तरिकतर्फ प्रतिलिटर ७ रुपैयाँ र अन्तर्राष्ट्रियतर्फ काठमाडौंका लागि प्रतिकिलोलिटर ४६ डलरले मूल्य बढाइएको छ। नयाँ मूल्य समायोजनसँगै पेट्रोलियम पदार्थमा केही राहत देखिए पनि ग्यासको मूल्यवृद्धिले उपभोक्तामा थप आर्थिक भार पर्ने देखिएको छ।
Discussion about this post