काठमाडौं । नेकपा एमाले संसदीय दलका नेता रामबहादुर थापाले सरकारले अध्यादेशमार्फत ऐन निर्माण गर्न खोज्नु संसदीय प्रणालीमाथिको हस्तक्षेप भएको टिप्पणी गरेका छन् ।
बुधबार विपक्षी दलहरूको बैठकपछि सञ्चारकर्मीसँग कुरा गर्दै उनले संविधानले संसद नबसेको अवस्थामा मात्र अध्यादेश ल्याउन सकिने व्यवस्था गरे पनि वर्तमान परिस्थिति त्यसअनुसार नभएको दाबी गरे ।
आह्वान भइसकेको संसद स्थगित गरेर अध्यादेश जारी गर्नु अलोकतान्त्रिक, असंवैधानिक र असंसदीय कदम रहेको थापाले बताए ।
उनले भने, “अध्यादेश ल्याउन पाइन्छ, तर संसद नबसेको अवस्थामा मात्र । अहिले त सदन स्थगित गरेर अध्यादेश ल्याइएको छ, यो विगतको अभ्यासभन्दा उल्टो हो ।”
थापाले संसदको मुख्य भूमिका ऐन निर्माण गर्नु भएको उल्लेख गर्दै सरकारले ऐन कार्यान्वयन गर्ने जिम्मेवारी मात्रै पाउनुपर्ने बताए । उनले सरकारको पछिल्लो अभ्यासलाई व्यवस्थापिकाको अधिकार क्षेत्रमाथिको अतिक्रमणको रूपमा व्याख्या गरे ।
अध्यादेशमार्फत शासन सञ्चालन गर्ने प्रयास जारी रहे विपक्षी दलहरू एकजुट भएर प्रतिवाद गर्ने चेतावनीसमेत उनले दिएका छन् ।
Discussion about this post