पोखरा । गण्डकी प्रदेशका प्रमुख डिल्लीराज भट्ट र राष्ट्रिय सभाका उपाध्यक्ष लिलाकुमारी भण्डारीबीच भेटवार्ता भएको छ ।
पोखरा स्थित प्रदेश प्रमुख निवासमा भएको भेटवार्ताका क्रममा प्रदेश प्रमुख भट्टले संघीय संसदको माथिल्लो सदन राष्ट्रिय सभामा निर्विरोध निर्वाचित हुनुभएकोमा उपाध्यक्ष भण्डारीलाई हार्दिक बधाईका साथ सफल कार्यकालको शुभकामना व्यक्त गर्नुभएको थियो ।
प्रदेश प्रमुख भट्टले संघ र प्रदेशबीचको समन्वय तथा सहकार्यमा जोड दिनुहुँदै प्रदेशमा कानुन निर्माण प्रक्रिया तथा त्यसको कार्यान्वयन, नीति निर्माणसँग सम्बन्धित विषयहरू साझा गर्नुभएको थियो ।
संवैधानिक पदाधिकारीहरूबीचको औपचारिक छलफलका क्रममा उपाध्यक्ष भण्डारीले समसामयिक विषयमा चासो राख्नुभएको थियो । मुलुकमा प्राप्त उपलब्धिलाई संस्थागत गर्ने महत्वपूर्ण आधार प्रदेश भएको उल्लेख गर्दै उहाँले प्रदेशको सफलता नै संघीय लोकतान्त्रिक गणतन्त्रको सफलता भएको उल्लेख गर्नुभयो ।
व्यवस्था सुदृढ हुनका लागि प्रदेशहरू सुदृढ हुनुपर्ने भन्दै उहाँले संविधानको पूर्ण कार्यान्वयनका लागिसंघीय, प्रादेशिक र स्थानीय तहका कानुनको तर्जुमा र त्यसको कार्यान्वयनबाटै सम्भव रहने बताउनुभयो । प्रदेश प्रमुख प्रदेशको प्रमुखमात्र नभई केन्द्रको प्रतिनिधि पनि भएकाले संघ र प्रदेशबीचको समन्वयकर्ता भएको उल्लेख गर्नुभयो ।
Discussion about this post