काठमाण्डौ – नेकपा एमालेले उपाध्यक्ष एवं संसदीय दलका नेता रामबहादुर थापा बादलले संसदमा नेपाली सेना, कर्मचारीतन्त्र र अन्तर्राष्ट्रिय समुदायबारे दिएको अभिव्यक्ति त्रुटिपूर्ण भएको भन्दै सच्याएको छ ।
हिजो बसेको सचिवालय बैठकले थापाको भनाइ सच्याएको हो । ‘बैठकले देशको संविधान र प्रचलित कानुनबमोजिम निर्माण भएका नेपाली सेनालगायत राज्यका सबै सुरक्षा निकाय, निजामती प्रशासन (ब्युरोक्रेसी) र अन्तर्राष्ट्रिय समुदायप्रति हाम्रो पार्टीको सम्बन्ध पूर्ववत् एवम् मित्रवत् रहेको र यस्तो सम्बन्ध भविष्यमा अझ सुदृढ बनाइने कुरा स्पष्ट पारेको छ,’ बैठकमा निर्णयमा भनिएको छ ।
पार्टी महासचिव शंकर पोखरेलले बैठकपछि विज्ञप्ति निकालेर बादलको अभिव्यक्ति सच्याइएको जानकारी दिनुभएको छ । अस्ति बिहीबार संसद बैठकमा थापाले नेपाली सेना, कर्मचारीतन्त्र र विदेशी शक्ति मिलेर रास्वपाले ‘जादुमयी विजय’ हासिल गरेको टिप्पणी गर्नुभएको थियो ।
एमाले सचिवालय बैठकले प्रधानमन्त्री वालेन्द्र शाहलाई बधाई र चुनाव सम्पन्न गर्ने सबैलाई धन्यवाद दिएको छ । बैठकले चुनावमार्फत अभिव्यक्त भएको जनमतलाई सम्मान गर्दै विजयी भएका सम्पूर्णलाई बधाई ज्ञापन गरेको हो ।
Discussion about this post