कञ्चनपुर । कञ्चनपुरको वेदकोट नगरपालिकामा नगर प्रहरीहरूका लागि ५ दिने ‘विपद् जोखिम न्यूनीकरण तथा व्यवस्थापन’ सम्बन्धी आधारभूत तालिम सम्पन्न भएको छ।
नेपाल राष्ट्रिय समाज कल्याण संघ (एनएनएसडब्लुए) र डिसिए नेपालद्वारा सञ्चालित ‘सुदृढ’ परियोजना अन्तर्गत नगरपालिकाका नगर प्रहरीहरूलाई दक्ष बनाउने उद्देश्यले यो तालिम प्रदान गरिएको हो।
तालिमको समापन गर्दै वेदकोट नगरपालिकाका नगर प्रमुख भोजराज बोहराले नगर प्रहरीको क्षमता अभिवृद्धिले नगरको सुरक्षा र विपद् व्यवस्थापनमा महत्त्वपूर्ण सहयोग पुग्ने बताउनुभयो। उहाँले नगरबासीको सुरक्षाका लागि नगर प्रहरीलाई स्रोतसाधन र आवश्यक सीपले सधैं तयारी अवस्थामा राखिने प्रतिबद्धता समेत व्यक्त गर्नुभयो।
एनएनएसडब्लुएका कार्यकारी निर्देशक अशोक विक्रम जैरुले विपद्को समयमा स्थानीय स्तरमा खटिने सुरक्षाकर्मीहरू दक्ष हुनुपर्नेमा जोड दिनुभयो। संस्थाले आगामी दिनमा पनि स्थानीय सरकारसँग समन्वय गरी समुदायको सुरक्षा र उत्थानशीलताका लागि यस्ता प्रविधियुक्त तालिमहरूलाई निरन्तरता दिने उहाँले बताउनुभयो।
सुदृढ परियोजनाका संयोजक राजकुमार सुनारले नगर प्रहरीलाई साधनस्रोत र सीपले सम्पन्न बनाउँदा स्थानीय तहको विपद् प्रतिकार्य क्षमता मजबुत हुने बताउनुभयो। उहाँले विपद्को समयमा समुदायमा सबैभन्दा पहिला पुग्ने शक्ति नै नगर प्रहरी भएकाले उनीहरूको आत्मबल बढाउन र कार्यकुशलता थप्न यो तालिमले महत्त्वपूर्ण भूमिका खेल्ने विश्वास व्यक्त गर्नुभयो। तालिमपश्चात् नगर प्रहरीहरूले फिल्डमा आइपर्ने जुनसुकै चुनौतीको सामना गर्दै नागरिकको जीउधनको सुरक्षामा थप प्रभावकारी रूपमा कार्य सम्पादन गर्न सक्ने उहाँले बताउनुभयो।
एनएनएसडब्लुएका वातावरणविद् भोजराज भट्टले ५ दिनसम्म चलेको तालिममा विपद् व्यवस्थापनका विविध आयामहरू समेटिएको बताउनुभयो। उहाँका अनुसार सहभागीहरूलाई विपद् जोखिम न्यूनीकरणको अवधारणा, सुदूरपश्चिममा विद्यमान विपद्का प्रकार र संकटको समयमा मानवीय सिद्धान्त, नैतिकता एवम् जवाफदेहिताका विषयमा विस्तृत प्रशिक्षण दिइएको छ।
त्यस्तै संकट व्यवस्थापन, नेतृत्व विकास, र भीड नियन्त्रणका साथै मानवीय सहायताका सिद्धान्तहरूबारे समेत प्रशिक्षण दिइएको छ। तालिममा विशेषगरी सर्पको सुरक्षित उद्धार, सर्पदंशको व्यवस्थापन, अग्नि नियन्त्रण, र बाढीमा गरिने खोज तथा उद्धारका लागि मोटरबोट सञ्चालनको व्यावहारिक अभ्यास समेत गराइएको वातावरणविद् भट्टले जानकारी दिनुभयो।
समापन कार्यक्रमको सञ्चालन नगरपालिकाका विपद् सम्पर्क व्यक्ति सुनिल चन्दले गर्नुभएको थियो। उक्त कार्यक्रममा कञ्चनपुरका सुरक्षा निकायका प्रमुखहरूको समेत उपस्थिति रहेको थियो।
Discussion about this post