कञ्चनपुर । नेपाल राष्ट्रिय समाज कल्याण संघ (एनएनएसडब्ल्यूए) कञ्चनपुर र मर्सीकोर नेपालको साझेदारीमा सञ्चालित ‘समुदायका लागि जलवायु उत्थानशील’ (सीआरसी) परियोजना अन्तर्गत दुई दिने क्षमता विकास तालिम सम्पन्न भएको छ।
दोधारा चाँदनी र कृष्णपुर नगरपालिकाका जनप्रतिनिधि, सामुदायिक विपद् व्यवस्थापन समितिका प्रतिनिधि र युवा समूहका लागि स्थानीय योजना तर्जुमा प्रक्रियाबारे तालिम प्रदान गरिएको हो।
तालिमको समापन कार्यक्रममा कृष्णपुर नगरपालिकाकी नगर उप-प्रमुख द्रोपती राना प्रमुख अतिथि रहनुभएको थियो भने एनएनएसडब्ल्यूएका कार्यकारी निर्देशक अशोक विक्रम जैरुको कार्यक्रमको सभापतित्व रहेको थियो।
सीआरसी परियोजनाका संयोजक महेश घिमिरेले तालिया स्थानीय तहको सात चरणको योजना तर्जुमा प्रक्रियामा जनप्रतिनिधि, समिति र युवाहरूलाई संलग्न गराई योजनाहरू कसरी बन्छन् र त्यसलाई कसरी बनाउनुपर्छ भन्नेबारे जानकारी दिइएको बताउनुभयो। योजना निर्माणमा कहाँ ‘ग्याप’ छ र त्यसलाई आगामी दिनमा समुदाय र जनप्रतिनिधि मिलेर कसरी पूर्ण गर्ने भन्ने विषयमा तालिम केन्द्रित रहेको उहाँले बताउनुभयो। जनप्रतिनिधि र समुदायबीचको ग्याप घटाउन, त्यसलाई न्यूनीकरण गर्न र योजनालाई परिपक्व ढंगले ल्याउन यो तालिमले सहयोग पुग्ने उहाँले बताउनुभयो।
कार्यक्रममा बोल्दै प्रमुख अतिथि एवम् कृष्णपुर नगरपालिकाकी उप-प्रमुख द्रोपती रानाले तालिमले जनप्रतिनिधि र समुदायबीचको दुरी घटाउन मद्दत पुग्ने बताउनुभयो। उहाँले समुदायस्तरबाटै वास्तविक आवश्यकताका आधारमा योजनाहरू छनोट भई आएमा मात्र विकासले सार्थकता पाउने बताउनुभयो।
त्यसैगरी एनएनएसडब्ल्यूएका कार्यकारी निर्देशक अशोक विक्रम जैरुले विकास प्रक्रियामा युवा र विपद् व्यवस्थापन समितिको सहभागिता अपरिहार्य रहेको उल्लेख गर्नुभयो। उहाँले जलवायु परिवर्तनको जोखिमलाई मध्यनजर गर्दै योजना तर्जुमा गर्दा उत्थानशील समाज निर्माणमा ध्यान दिनुपर्नेमा जोड दिनुभयो।
सीआरसी परियोजनाका मिल अफिसर गोविन्द प्रसाद उपाध्यायले तालिममा सहभागीहरूलाई योजना तर्जुमाका प्राविधिक पक्ष र समयसीमाबारे जानकारी गराइएको बताउनुभयो। योजना तर्जुमाको समयतालिका र प्रक्रियागत ज्ञानको अभावमा समुदायका महत्त्वपूर्ण योजनाहरू नछुटुन् भनेर सहभागीहरूलाई सचेत गराइएको उहाँले बताउनुभयो।
तालिममा सहभागी जनप्रतिनिधि र युवाहरूले आगामी दिनमा आफ्नो वडा र नगरपालिकाको बजेट तथा कार्यक्रम निर्माणमा सक्रिय भूमिका खेल्ने प्रतिबद्धता जनाएका छन्।
Discussion about this post