काठमाडौँ – निर्वाचनमा अप्रत्याशित पराजय व्यहोरेपछि गगन थापाले नैतिक जिम्मेवारी लिँदै नेपाली कांग्रेसको सभापति पदबाट राजीनामा दिएका छन्। केन्द्रीय कार्यसमिति बैठकको मिति तय भएलगत्तै उनले उपसभापति विश्वप्रकाश शर्मालाई राजीनामा बुझाएका हुन्। यद्यपि, उक्त राजीनामा पार्टीले औपचारिक रूपमा सार्वजनिक गरेको छैन।
पार्टीका एक पदाधिकारीका अनुसार चैत ६ गते बस्ने केन्द्रीय कार्यसमिति बैठकमा थापाको राजीनामाबारे औपचारिक छलफल हुनेछ। “राजीनामा दिने अधिकार सभापतिको हो, उहाँले दिनुभएको छ, तर स्वीकृत गर्ने वा नगर्ने भन्ने निर्णय केन्द्रीय कार्यसमितिको हुनेछ,” ती पदाधिकारीले बताएका छन्।
यसअघि पुस २७ देखि ३० गतेसम्म भृकुटीमण्डप मा सम्पन्न विशेष महाधिवेशनबाट थापाको नेतृत्वमा नयाँ केन्द्रीय कार्यसमिति चयन भएको थियो। तर उक्त महाधिवेशनको वैधानिकतामाथि पूर्व सभापति शेरबहादुर देउवा र कार्यवाहक सभापति पूर्णबहादुर खड्काले सर्वोच्च अदालतमा रिट दायर गरेका छन्, जुन हाल विचाराधीन अवस्थामा छ।
तत्कालीन महामन्त्री रहेका थापा र शर्माले ५४ प्रतिशत महाधिवेशन प्रतिनिधिको हस्ताक्षरका आधारमा विशेष महाधिवेशन आह्वान गरेका थिए। पार्टी विधानअनुसार ४० प्रतिशत प्रतिनिधिको माग आएमा तीन महिनाभित्र विशेष महाधिवेशन बोलाउनुपर्ने व्यवस्था रहेको छ।
Discussion about this post