कञ्चनपुरको कृष्णपुरमा जैविक तटबन्ध निर्माण कार्य तीव्र, बाढीको जोखिम कम हुने भएपछि स्थानीय हर्षित

कञ्चनपुर । कञ्चनपुरको कृष्णपुर नगरपालिका–२ नयाँबस्तीस्थित बन्द नदी किनारमा जैविक तटबन्ध निर्माण कार्य सफलतापूर्वक सम्पन्न भएसँगै अब अठन्नीफाँटामा निर्माण कार्य सुरु गरिने भएको छ। बर्सेनि वर्षातको समयमा हुने नदी कटानका कारण बगर क्षेत्र र बस्ती जोखिममा रहँदै आएको उक्त क्षेत्रमा तटबन्ध निर्माण गरिने भएपछि स्थानीय बासिन्दाहरू हर्षित भएका छन्।

अठन्नीफाँटा क्षेत्रमा भू-क्षय रोक्न र वातावरणीय सन्तुलनका लागि प्रशस्त बोटबिरुवा समेत रोपिएका छन्। यी बिरुवाहरूले वर्षामा माटो जोगाउनुका साथै गर्मीयाममा चल्ने तातो हावा (लू) लाई रोक्न समेत मद्दत पुर्‍याउँदै आएका छन्। नेपाल राष्ट्रिय समाज कल्याण संघ (एनएनएसडब्लुए) र मर्सीकोर नेपालको साझेदारीमा सञ्चालित ‘समुदायका लागि जलवायु उत्थानशील कार्यक्रम’ (सिआरसी) अन्तर्गत कृष्णपुर नगरपालिका र वडा नम्बर–२ सँगको सहकार्यमा यो कार्य सञ्चालन गरिएको हो।

यसैक्रममा कृष्णपुर नगरपालिका वडा नम्बर -२ र -३ अन्तर्गत बाढीको उच्च जोखिममा रहेका क्षेत्रहरूको सम्भाव्यता अध्ययन कार्य वडाका जनप्रतिनिधि, प्राविधिक र एनएनएसडब्लुएको संयुक्त टोलीले सम्पन्न गरेको छ। उक्त अध्ययनका क्रममा वडा नम्बर -२ को बन्द नदीस्थित कालिका मन्दिर नजिक थप १०० मिटर र अठन्नीफाँटा झोलुङ्गे पुल नजिक करिब ३५० मिटर जैविक तटबन्ध निर्माण गर्नुपर्ने आवश्यकता देखिएको छ। त्यस्तै, वडा नम्बर -३ को नयाँ कटान भइरहेको समुदायको पश्चिम क्षेत्रमा करिब २०० मिटर जैविक तटबन्ध निर्माण गरिने भएको छ।

नेपाल राष्ट्रिय समाज कल्याण संघ (एनएनएसडब्लुए) द्वारा सञ्चालित ‘समुदायका लागि जलवायु उत्थानशील कार्यक्रम’ (सिआरसी) का परियोजना संयोजक महेश घिमिरेले परियोजनाले विपद् जोखिम न्यूनीकरण र उत्थानशीलताका सन्दर्भमा पूर्व तयारी र समुदायलाई सक्षम बनाउने काम गरिरहेको बताउनुभयो। उहाँले नगरपालिका र वडासँगको सहकार्यमा दोधा जलाधार क्षेत्रका बन्द र बनहरा नदीले कटान गरिरहेका ठाउँमा जैविक तटबन्धको थालनी गरिएको जानकारी दिनुभयो। नगरपालिकाले तटबन्ध निर्माणका लागि ५ लाख रुपैयाँ विनियोजन गरिसकेको र प्राविधिकहरूसँग मिलेर ठाउँ पहिचानको कार्य समेत सम्पन्न भइसकेको संयोजक घिमिरेले बताउनुभयो।

बन्द नदी विपद व्यवस्थापन समितिका अध्यक्ष शिव नेपाली र अठन्नीफाँटा विपद् व्यवस्थापन समितिका अध्यक्ष सत्य राज खाडायतले तटबन्ध निर्माणले बस्तीलाई सुरक्षित बनाउन महत्वपूर्ण भूमिका खेल्ने विश्वास व्यक्त गर्नुभएको छ।