काठमाडौँ । नेपाल कम्युनिष्ट पार्टी (एमाले) ले आगामी प्रतिनिधिसभा निर्वाचनका लागि आज आफ्नो चुनावी घोषणापत्र सार्वजनिक गर्ने भएको छ। पार्टी अध्यक्ष केपी शर्मा ओली सहित पदाधिकारीहरूले काठमाडौँमा विशेष कार्यक्रम आयोजना गरी घोषणापत्र सार्वजनिक गर्ने कार्यक्रम रहेको छ।
एमालेका अनुसार घोषणापत्रमा ‘समृद्ध नेपाल निर्माण’लाई मुख्य लक्ष्यका रूपमा अघि सार्दै सुशासन, रोजगारी सिर्जना, सामाजिक न्याय तथा संस्थागत सुधारका विषयलाई प्राथमिकतामा राखिएको छ। आर्थिक विकासलाई तीव्रता दिने, युवालाई स्वदेशमै रोजगारीको अवसर उपलब्ध गराउने तथा सार्वजनिक सेवा प्रवाहलाई प्रभावकारी बनाउने प्रतिबद्धता पनि घोषणापत्रमा समेटिने जनाइएको छ।
पार्टीले मुलुकमा राजनीतिक स्थिरता, विकास र सुशासन कायम गर्न नयाँ सत्ता समीकरण आवश्यक रहेको उल्लेख गर्दै आगामी निर्वाचनमा स्पष्ट बहुमत प्राप्त गर्ने लक्ष्य राखेको बताएको छ। नेताहरूका अनुसार घोषणापत्रमार्फत मतदातासमक्ष स्पष्ट दृष्टिकोण, नीतिगत योजना र कार्यान्वयनयोग्य कार्यक्रम प्रस्तुत गरिनेछ।
आगामी निर्वाचनलाई निर्णायक अवसरका रूपमा लिएको एमालेले घोषणापत्र सार्वजनिकसँगै देशभर चुनावी अभियानलाई थप तीव्र बनाउने तयारी गरेको जनाएको छ।
Discussion about this post