कञ्चनपुरमा विद्यालयस्तरीय एन–प्याब्सन नृत्य प्रतियोगिता सम्पन्न

कञ्चनपुर । एन–प्याब्सन भीमदत्तनगर कमिटीद्वारा आयोजित विद्यालयस्तरीय नृत्य प्रतियोगिता २०८२ शनिबार सम्पन्न भएको छ। प्रतियोगितामा भीमदत्तनगरका १३ र कृष्णपुर नगरपालिकाका २ गरी जम्मा १५ विद्यालय सहभागी भएका थिए।

प्रतियोगितामा एपेक्स विद्यालयले प्रथम स्थान हात पार्दै उत्कृष्ट नृत्य प्रदर्शन गरेको छ। त्यस्तै रिच एकेडेमी बैंक द्वितीय, लिटिल बुद्ध एकेडेमी तृतीय, र फ्लोरिडा इन्टरनेशनल माध्यमिक विद्यालय चौथो स्थानमा रहेका छन्। विजयी विद्यालयहरूले क्रमशः १५ हजार, १२ हजार, १० हजार र ७ हजार रुपैयाँसहित ट्रफी र प्रमाणपत्र प्राप्त गर्नेछन्। पुरस्कारबारे जानकारी एन–प्याब्सन भीमदत्तनगरका संयोजक द्विजराज भट्टले दिनुभयो।

कार्यक्रम एन–प्याब्सन भीमदत्तनगर नगर कमिटीका अध्यक्ष द्विजराज भट्टको सभापतित्वमा सम्पन्न भएको हो। कार्यक्रममा भीमदत्त नगरपालिकाका नगर प्रमुख पदम बोगटी प्रमुख अतिथि रहनुभएको थियो। त्यस्तै विशिष्ट अतिथिमा एन–प्याब्सनका केन्द्रीय वरिष्ठ उपाध्यक्ष श्यामसिंह मौनी र केन्द्रीय कानुन सल्लाहकार प्रकाशबहादुर पाण्डेय रहनुभएको थियो। अतिथिहरूले यस्ता प्रतियोगिताले विद्यार्थीहरूको आत्मविश्वास, सिप तथा कलात्मक क्षमताको विकासमा महत्वपूर्ण भूमिका खेल्ने धारणा व्यक्त गरेका छन्।

प्रतियोगिता सफल बनाउन भीमदत्त नगरपालिका मुख्य प्रायोजकका रूपमा रहेको थियो भने सह–प्रायोजकमा सरस्वती पुस्तक भण्डार, ज्ञान भण्डार, ठाकुर पुस्तक भण्डार (कैलाली), टाइम्स प्रकाशन, चौलानी ट्रेडर्स एण्ड गार्मेन्ट सिलाई सेन्टर, रिडमोर प्रकाशन तथा स्वस्तिक बुक रहेका थिए। आयोजक समितिका अनुसार आगामी वर्षहरूमा प्रतियोगितालाई अझ भव्य तथा व्यवस्थित बनाइनेछ।