कञ्चनपुर उद्योग वाणिज्य संघको सचिव पदमा युवा व्यवसायी नरेन्द्र प्रसाद जोशीको उम्मेदवारी

कञ्चनपुर । कञ्चनपुर उद्योग वाणिज्य संघको १८ औँ कार्यकारिणी समितिको निर्वाचनका लागि युवा व्यवसायी नरेन्द्र प्रसाद जोशीले सचिव पदमा आफ्नो उम्मेदवारी घोषणा गर्नुभएको छ। विगत एक दशकदेखि कञ्चनपुरलाई मुख्य आधार बनाएर व्यवसायमा सक्रिय जोशीले व्यवसायिक क्षेत्रको नेतृत्व र विकासका लागि आफूलाई सचिव पदको आकांक्षीका रूपमा अघि सार्नुभएको हो।

लामो समयदेखि व्यवसायिक क्षेत्रको उत्थानमा समर्पित जोशीले यसअघि संघको सदस्य पदमा निर्वाचित भएपश्चात दिइएका हरेक जिम्मेवारीलाई कुशलतापूर्वक सम्पन्न गर्नुभएको इतिहास छ। उहाँले यसअघि नै सचिवालय सदस्य र आर्थिक समिति सदस्य जस्ता महत्वपूर्ण पदमा रहेर संघको आन्तरिक व्यवस्थापन र आर्थिक पारदर्शिताका लागि उल्लेख्य भूमिका निर्वाह गरिसक्नुभएको छ।

जोशीको कार्यक्षमता महोत्सव व्यवस्थापनका क्रममा समेत सफल देखिएको छ, जहाँ उहाँले २०७९ सालको महोत्सवमा पर्यटन प्रवर्द्धन समिति, २०८० मा स्टल बुकिङ र २०८१ मा टिकट व्यवस्थापन समितिको संयोजक बनेर कुशलतापूर्वक जिम्मेवारी निभाउनुभएको थियो। यी महत्वपूर्ण जिम्मेवारीहरूमा उहाँले देखाएको व्यवस्थापकीय कौशलले संघभित्र उहाँको बलियो पहिचान स्थापित गरेको छ।

विशेषगरी, भारतको देहरादुनमा आयोजित ‘अन्तर्राष्ट्रिय व्यापार मेला तथा पर्यटन महोत्सव २०२५’ मा नेपालको तर्फबाट सहभागिता जनाउन जोशीले खेलेको भूमिका प्रशंसनीय रहेको छ। उहाँकै सभापतित्वमा काठमाडौँमा व्यवसायीहरूसँग महोत्सव सञ्चालनका लागी अन्तरक्रिया कार्यक्रम सम्पन्न हुनुका साथै नेपाल सरकारका विभिन्न मन्त्रालय, विभाग र भारतीय राजदूतावाससँगको सम्पूर्ण प्रशासनिक तथा कानुनी प्रक्रियाको व्यवस्थापन समेत उहाँकै अग्रसरतमा सम्पन्न गरिएको थियो।

नयाँ दिल्लीस्थित नेपाली राजदूतावासमा समन्वय बैठकदेखि मेलाको अन्त्यसम्म संघले सुम्पिएका सम्पूर्ण जिम्मेवारीहरूलाई पूर्ण निष्ठाका साथ पुरा गर्दै उहाँले आफ्नो अन्तर्राष्ट्रिय समन्वय क्षमता प्रमाणित गरिसक्नुभएको छ। संघको प्रतिनिधित्व गर्दै हरदम व्यवसायीको समस्या समाधानमा खटिने जोशीले यस पटकको निर्वाचनमा आफूलाई बलियो उम्मेदवारका रूपमा प्रस्तुत गर्नुभएको छ।