कञ्चनपुर । कृष्णपुर नगरपालिकामा जलवायु परिवर्तनका असरलाई मध्यनजर गर्दै जलवायु परिवर्तन अनुकूलित सम्भावित कृषि वस्तुको मूल्य श्रृंखला अध्ययन सार्वजनिकिकरण तथा छलफल कार्यक्रम सम्पन्न भएको छ। ‘समुदायका लागि जलवायु उत्थानशील कार्यक्रम’ अन्तर्गत नगरपालिकाको सभाहलमा कार्यक्रम आयोजना गरिएको हो।
कार्यक्रममा समुदायका लागि जलवायु उत्थानशील परियोजनाका संयोजक महेश घिमिरेले जलवायु परिवर्तनका कारण कृषि क्षेत्रमा बढ्दै गएको जोखिम न्यूनीकरणका लागि वैज्ञानिक अध्ययन र योजनाबद्ध हस्तक्षेप आवश्यक रहेको बताए। उनले स्थानीय अवस्था र सम्भावनालाई आधार मानेर जलवायु अनुकूल कृषि प्रणाली विकास गर्न अध्ययनले महत्वपूर्ण मार्गदर्शन गर्ने उल्लेख गरे।
कृष्णपुर नगरपालिकाका नगर उपप्रमुख द्रोपती रानाले जलवायु परिवर्तनले कृषकको जीविकोपार्जनमा प्रत्यक्ष असर पारिरहेको बताउँदै नगरपालिकाले जलवायु अनुकूल कृषि प्रवर्द्धनलाई प्राथमिकतामा राखेको बताइन्। उनले यस्ता अध्ययन र छलफल कार्यक्रमले नीति निर्माण र कार्यक्रम कार्यान्वयनमा सहयोग पुग्ने विश्वास व्यक्त गरिन्।
कार्यक्रममा कृषि परामर्शकर्ता दिपक अरियालले उत्पादन सामग्री आपूर्तिदेखि उपभोगसम्मको मूल्य श्रृंखलाबारे जानकारी दिँदै जलवायु परिवर्तनका कारण कृषिमा परेका असर, कृष्णपुर नगरपालिकाका मुख्य खेती प्रणाली, उत्पादकत्व तथा सम्भावनाबारे अध्ययन प्रतिवेदन प्रस्तुत गरे। साथै उनले कृष्णपुर क्षेत्रमा जलवायु अनुकूल उत्पादन गर्न सकिने कृषि वस्तु, तिनको बजार सम्भावना, मूल्य अभिवृद्धि तथा किसानको आम्दानी वृद्धि गर्न सकिने उपायहरूबारे समेत प्रकाश पारे।
छलफलका क्रममा नगरपालिकाका सम्बन्धित कर्मचारी, कृषि शाखाका कर्मचारी, एग्रोभेट सञ्चालक, किसान, सहकारी प्रतिनिधि तथा अन्य सरोकारवालाहरूले जलवायु परिवर्तनका कारण कृषि क्षेत्रमा देखिएका समस्या, सिँचाइ, बीउबिजन, प्रविधि तथा बजार पहुँचमा रहेका चुनौतीबारे आफ्ना धारणा राखेका थिए।
सहभागीहरूले अध्ययन प्रतिवेदनले किसानलाई व्यवसायिक कृषि तर्फ उन्मुख गराउन र स्थानीय उत्पादनको बजारीकरणमा सहयोग पुग्ने विश्वास व्यक्त गरेका छन्। कार्यक्रम नेपाल राष्ट्रिय समाज कल्याण संघ (एनएनएसडब्लुए), मर्सिकोर नेपाल र क्लाइमेट रेजिलेन्स अलाइन्सको सहकार्य तथा कृष्णपुर नगरपालिकाको समन्वयमा सम्पन्न भएको हो।
Discussion about this post