काठमाडौं – भौतिक पूर्वाधार तथा यातायात, शहरी विकास र ऊर्जा मन्त्री कुलमान घिसिङले बाढीपहिरोले क्षतविक्षत बनेको बीपी राजमार्गको स्थलगत अवलोकन गरेका छन्। उनी काभ्रे जिल्लाको विभिन्न खण्डमा पुगेका थिए। मन्त्री घिसिङ भौतिक पूर्वाधार तथा यातायात मन्त्रालयका सचिव, सडक विभागका महानिर्देशकसहितको टोलीसहित शुक्रबार (असोज २३ गते) काभ्रे पुगेका हुन्। टोलीले रोशी गाउँपालिका र नमोबुद्ध नगरपालिकाको सिमाना चौकीडाँडा क्षेत्रका सडक मर्मत र पुनर्निर्माण कार्यको निरीक्षण गरेको थियो।
अवलोकनका क्रममा मन्त्री घिसिङले सम्बन्धित निकायलाई असोज २४ गते साँझसम्म ट्र्याक खोलिसक्ने गरी कामलाई तीव्रता दिन निर्देशन दिएका छन्। स्थलगत निरीक्षणका क्रममा नमोबुद्धका मेयर कुन्साङ लामा, रोशी गाउँपालिकाका अध्यक्ष दिनेश लामा र महाभारत गाउँपालिकाका अध्यक्ष कान्छालाल जिम्बाले मन्त्रीलाई बाढीपहिरोका कारण स्थानीयले भोग्नुपरेको कठिनाइबारे जानकारी दिएका थिए।
गत असोज १७, १८ र १९ गतेको अविरल वर्षाका कारण बीपी राजमार्गका विभिन्न खण्डमा रोशी खोलाको बाढीले सडक कटान गरेको थियो। कतिपय स्थानमा पैदल आवागमनसमेत अवरुद्ध हुँदा स्थानीयहरू भिरको पहरो समाउँदै जोखिमपूर्ण रूपमा ओहोरदोहोर गर्न बाध्य भएका थिए। हालसम्म तीन स्थानमा डाइभर्सन निर्माण भइसकेको र बाँकी ठाउँमा मर्मत कार्य तीव्र गतिमा भइरहेको सडक विभागले जनाएको छ।
Discussion about this post