सुदूरपश्चिमका दुई मन्त्री सवार गाडी आपसमा ठोक्किँदा क्षति

कैलाली – सुदूरपश्चिम प्रदेशका दुई मन्त्री सवार गाडी मंगलबार दिउँसो कैलालीको चिसापानीमा एक आपसमा ठोक्किएका छन्। भौतिक पूर्वाधार विकास मन्त्री सुरेन्द्र पाल र आन्तरिक मामिला तथा कानुन मन्त्री हिरासिंह सार्की सवार गाडीहरू कार्यक्रममा सहभागी हुन चिसापानी जाँदै गर्दा दुर्घटनामा परेका हुन्।

जिल्ला प्रहरी कार्यालय, कैलालीका डिएसपी राजकुमार सिंहका अनुसार मन्त्री पाल चढेको बा.२ झ १४१९ नम्बरको गाडी र मन्त्री सार्की चढेको से.१ झ ३३० नम्बरको गाडी आपसमा ठोक्किएको हो। दुर्घटना दिउँसो करिब १ बजेर १५ मिनेट जाँदा भएको बताइएको छ।

डिएसपी सिंहले दुवै गाडीमा क्षति पुगे पनि कुनै मानवीय क्षति भने नभएको जानकारी दिए। “सौभाग्यवश मानवीय क्षति छैन, तर गाडीमा केही क्षति भएको छ,” उनले अनलाइनखबरसँग भने।

प्रधानमन्त्री केपी शर्मा ओली समेत सहभागी रहेको चिसापानीमा आयोजित कार्यक्रममा सहभागी हुन दुवै मन्त्री जाँदै गरेका थिए। दुर्घटनापछि कार्यक्रममा भने उनीहरू सहभागी भएका छन्।

प्रहरीले दुर्घटनाको थप अनुसन्धान गरिरहेको जनाएको छ।