नवरात्रको दोस्रो दिन आज ब्रह्मचारिणी देवीको पूजा आराधना

काठमाडौं । बडादसैँको नवरात्रअन्तर्गत आज दोस्रो दिन नवदुर्गामध्येकी ब्रह्मचारिणी देवीको विधिपूर्वक पूजा आराधना गरिँदैछ ।

नवरात्रको पहिलो दिन हिजो घटस्थापना गरी दशैँघर तथा पूजा कोठामा जमरा राखिएको थियो । आज घटस्थापना गरिएको स्थानमा ब्रह्मचारिणी देवीको आह्वान गरी पूजा आराधना गरिँदैछ ।

नवरात्रका नौ दिनसम्म दुर्गा सप्तशती, श्रीमद्देवीभागवतलगायत धार्मिक ग्रन्थको पाठ गर्ने परम्परा छ । देवीको आराधना गरेमा शक्ति, ऐश्वर्य र विद्या प्राप्त हुने धार्मिक विश्वास रहेको छ ।

यस अवसरमा देशभरका शक्तिपीठमा दर्शन तथा पूजाआराधना गर्ने भक्तजनको भीड लागेको छ । हनुमानढोका दरबारस्थित दशैँघरमा पनि विधिपूर्वक ब्रह्मचारिणी देवीको पूजा गरिँदैछ ।

नवरात्रमा गरिएको पूजाको प्रसाद विजयादशमीदेखि कोजाग्रत पूर्णिमासम्म ग्रहण गर्ने परम्परा रहेको छ ।