काठमाडौं । आईसीसी विश्वकप क्रिकेट लिग–२ अन्तर्गत नेपालले आज क्यानडासँग प्रतिस्पर्धा गर्दैछ। ओमानको अल अमिरातमा हुने खेल नेपाली समयअनुसार बिहान ११ः४५ बजे सुरु हुनेछ।
लिग–२ मा आफ्नो एकदिवसीय अन्तर्राष्ट्रिय मान्यता जोगाउने लक्ष्यसहित नेपाल मैदानमा उत्रनेछ। नेपालले जारी शृंखलामा क्यानडा र ओमानसँग समान दुई–दुई खेल खेल्नुपर्नेछ। बाँकी चार खेलमध्ये कम्तीमा तीन खेल जित्न सके नेपालले एकदिवसीय मान्यता जोगाउने सम्भावना बलियो बनाउन सक्छ।
ओमानले अघिल्लो खेलमा क्यानडालाई पराजित गरेपछि नेपालको शीर्ष चारमा पर्ने सम्भावना समाप्त भएको थियो। अब नेपालले प्लेअफमार्फत विश्वकप छनोटको सम्भावना कायम राख्नुपर्नेछ।
लिग–२ को अंकतालिकामा अमेरिका ४७ अंकसहित शीर्ष स्थानमा रहँदै च्याम्पियन बनिसकेको छ। स्कटल्यान्ड ४५ र नेदरल्यान्ड्स ३८ अंकसहित क्रमशः दोस्रो र तेस्रो स्थानमा छन्। ओमान ३३ अंकसहित चौथो, नामिबिया ३१ अंकसहित पाँचौँ र क्यानडा २५ अंकसहित छैटौँ स्थानमा छन्।
नेपाल भने ३२ खेलबाट २४ अंक जोड्दै सातौँ स्थानमा छ। आठौँ स्थानको यूएईको १९ अंक छ।
सन् २०१८ मा विश्वकप छनोटमार्फत एकदिवसीय अन्तर्राष्ट्रिय मान्यता प्राप्त गरेको नेपालका लागि बाँकी खेलहरू निकै महत्वपूर्ण छन्। त्यसैले क्यानडाविरुद्धको आजको खेल नेपालका लागि जित्नैपर्ने दबाबको खेल बनेको छ।
Discussion about this post