काठमाडौं । गृहमन्त्री सुदन गुरुङले राज्यका गोप्य तथा संवेदनशील सूचना चुहाउने जोसुकै व्यक्ति भए पनि कानुनी कारबाहीबाट उम्कन नसक्ने बताएका छन्।
सामाजिक सञ्जालमार्फत धारणा सार्वजनिक गर्दै गृहमन्त्री गुरुङले राज्यले सुम्पिएको गोपनीयतामाथि जानाजान विश्वासघात गर्ने व्यक्तिलाई कानुनको कठघरामा ल्याइने बताएका हुन्।
उनले गृह मन्त्रालय तथा मातहतका निकायमा जिम्मेवारीमा रहेका पदाधिकारी र कर्मचारीले आफ्नो पदीय मर्यादा बिर्सेर गोप्य वा संवेदनशील सूचना अनधिकृत व्यक्ति वा निकायलाई उपलब्ध गराउने प्रवृत्तिमाथि आफूले लामो समयदेखि निगरानी गरिरहेको बताएका छन्।
गृहमन्त्री गुरुङका अनुसार राज्यका संवेदनशील सूचना कुनै व्यक्तिको निजी सम्पत्ति नभई सार्वजनिक जिम्मेवारीसँग जोडिएको विषय हो। पदका कारण सूचनामा पहुँच प्राप्त भए पनि त्यसको दुरुपयोग गर्ने अधिकार कसैलाई नभएको उनको भनाइ छ।
उनले सानोभन्दा सानो सूचना, सुराक वा गोप्य जानकारीले अपराध रोकथाम, अनुसन्धान तथा भविष्यमा हुन सक्ने गम्भीर घटनाको सत्यतथ्य स्थापित गर्न महत्वपूर्ण भूमिका खेल्ने उल्लेख गरेका छन्।
यसैबीच, गृह मन्त्रालयले सुरक्षासँग सम्बन्धित महत्वपूर्ण सूचना चुहावट गरेको आरोपमा सशस्त्र प्रहरीका अतिरिक्त महानिरीक्षक (एआईजी) वंशी राज दाहाललाई निलम्बन गरेको छ।
पदीय आचरणविपरीत सुरक्षासम्बन्धी संवेदनशील सूचना चुहावट गरेको आरोपमा दाहालमाथि छानबिन गर्न गृह मन्त्रालयले असोज १९ गतेको निर्णयअनुसार निलम्बन गरेको हो। छानबिनका लागि अधिकृतसमेत तोकिएको छ भने तीन दिनभित्र प्रतिवेदन पेस गर्न भनिएको छ।
यही घटनाको सन्दर्भमा गृहमन्त्री गुरुङले राज्यका संवेदनशील सूचना चुहाउने जोसुकै भए पनि कानुनी दायरामा ल्याइने स्पष्ट पारेका हुन्।
Discussion about this post