लगानीकर्ताको मनोबल कमजोर, सेयर बजारमा निरन्तर गिरावट

काठमाडौं । लगानीकर्ताको मनोबल कमजोर बन्दै जाँदा नेपाली सेयर बजार लगातार ओरालो लागिरहेको छ। पछिल्लो साता नेप्से परिसूचक ४२.५५ अंकले घटेको छ।

साताको पाँच कारोबार दिनमध्ये चार दिन बजार घट्दा एक दिन मात्रै सामान्य वृद्धि भएको थियो। साताको अन्तिम दिन शुक्रबार नेप्से ११.९० अंकले घटेर २ हजार ५८७.२५ विन्दुमा बन्द भयो। साताको उच्च विन्दु २ हजार ६३८.२८ र न्यून विन्दु २ हजार ५८२.३६ रहेको थियो।

साताभर २३ अर्ब ९९ करोड ११ लाख रुपैयाँ बराबरको सेयर कारोबार भएको छ। अघिल्लो साता १८ अर्ब ८५ करोड रुपैयाँ बराबरको कारोबार भएको थियो। यद्यपि दैनिक औसत कारोबार रकममा भने करिब २३.६५ प्रतिशतले कमी आएको छ।

बजार घटेसँगै नेप्सेको कुल बजार पुँजीकरण पनि ७३ अर्ब २४ करोड रुपैयाँले घटेर ४४ खर्ब ५० अर्ब ३७ करोड रुपैयाँमा झरेको छ।

यस साता नेप्सेमा सूचीकृत सबै १३ उपसमूहमा गिरावट आएको छ। सेन्सेटिभ इन्डेक्स १.२८, फ्लोट इन्डेक्स १.५६ र सेन्सेटिभ फ्लोट इन्डेक्स १.३७ अंकले घटेका छन्। कुनै पनि कम्पनीको कारोबार सकारात्मक सर्किट लेभलमा पुग्न सकेन।

सांसद भीष्म आङदेम्बेले सरकारले निजी क्षेत्रप्रति विश्वासको वातावरण बनाउन नसकेको भन्दै संसद्मा प्रश्न उठाएका थिए। निजी क्षेत्रप्रति सरकारको व्यवहार र लगानीको सुरक्षाबारे प्रश्न उठ्दै गर्दा लगानीकर्ताको मनोबल कमजोर बनेको उनको भनाइ थियो।

यता, अर्थ मन्त्रालयले भने पुँजी बजारलाई सुदृढ बनाउने काम सरकारको प्राथमिकतामा रहेको जनाएको छ। अर्थ मन्त्रालयका सहसचिव महेश आचार्यले प्रतिनिधिसभाको अर्थ समितिको बैठकमा पुँजी बजारसँगै समग्र अर्थतन्त्र सरकारको प्राथमिकतामा रहेको बताएका छन्।

उनका अनुसार नेप्सेको पुनर्संरचना तथा प्रणालीलाई थप मजबुत बनाउने काम अघि बढिसकेको छ। साथै, सीडीएससीको सुधारसम्बन्धी कामसमेत अगाडि बढाइने मन्त्रालयले जनाएको छ।