काठमाडौं । २०औँ एसियाली खेलकुदअन्तर्गत पुरुष क्रिकेटमा नेपाल र जापानबीचको खेल वर्षाका कारण रद्द भएपछि दुवै टोलीले एक–एक अंक बाँडेका छन्। अंक बाँडिएसँगै नेपाल समूह ‘ए’ को विजेता बन्दै क्वार्टरफाइनलमा पुगेको छ।
पहिलो खेलमा अफगानिस्तानलाई ५ विकेटले पराजित गरेको नेपालले जापानविरुद्धको खेलबाट एक अंक पाएपछि समूह विजेताका रूपमा अन्तिम आठमा स्थान बनाएको हो। अब नेपालले सेप्टेम्बर २९ मा क्वार्टरफाइनलमा श्रीलंकासँग प्रतिस्पर्धा गर्नेछ। जापान भने समूह चरणबाटै बाहिरिएको छ।
जापानविरुद्ध टस हारेर पहिले ब्याटिङ गरेको नेपालले निर्धारित १५ ओभरमा १४९ रन बनाएको थियो। नेपालको इनिङ सकिएपछि लगातार वर्षा भएपछि जापानले ब्याटिङ गर्न पाएन र खेल रद्द गरिएको हो।
नेपालका लागि सन्दीप जोराले ३२ बलमा ५७ रन बनाए भने लोकेश बमले २२ बलमा अविजित ५२ रन जोडे। सन्दीपले पाँच चौका र तीन छक्का प्रहार गर्दा लोकेशले ६ छक्का र एक चौका प्रहार गरे।
नेपालले सुरुआतमा भने राम्रो प्रदर्शन गर्न सकेन। तेस्रो ओभरमा कुशल भुर्तेल ४ रनमै आउट भएका थिए। त्यसपछि आसिफ शेख र सन्दीप जोराले दोस्रो विकेटका लागि ३८ बलमा ५० रनको साझेदारी गरे। आसिफ २१ रन बनाएर आउट भए।
त्यसपछि लोकेश र सन्दीपले पाँचौँ विकेटका लागि २५ बलमा ५० रनको आक्रामक साझेदारी गर्दै नेपालको स्कोरलाई बलियो अवस्थामा पुर्याए।
नेपालले यसअघि अफगानिस्तानलाई पराजित गर्दै प्रतियोगितामा उत्कृष्ट सुरुआत गरेको थियो। समूह चरणको नतिजापछि अफगानिस्तानले क्वार्टरफाइनलमा भारतसँग खेल्नेछ। भारत, पाकिस्तान, श्रीलंका र बंगलादेश भने आईसीसीको शीर्ष चार वरीयताका आधारमा सिधै क्वार्टरफाइनलमा पुगेका छन्।
Discussion about this post