कञ्चनपुर । भीमदत्त नगरपालिका–११ का वडा अध्यक्ष प्रकाश थापाले स्थानीयको आवागमन सहज बनाउन आफ्नै व्यक्तिगत खर्च तथा वडा कर्मचारी र समाजसेवीहरूको श्रमदानमा करिब ३५ मिटर सडक मर्मत गरेका छन्।
महाकाली जनज्योति आधारभूत विद्यालयको पछाडिदेखि माता कुटिया हुँदै बरेली टोल जोड्ने पक्की पुलसम्मको बाटोमा सडक निर्माण गरिएको वडा अध्यक्ष थापाले बताएका छन्।
सडक निर्माणमा वडा कार्यालयका कर्मचारी तथा स्थानीय समाजसेवीहरूले श्रमदान गरेका छन् भने आवश्यक खर्च वडा अध्यक्ष थापाले व्यक्तिगत रूपमा व्यहोरेका हुन्।
वडा अध्यक्ष थापाले सडक उत्कृष्ट रूपमा निर्माण नभए पनि दैनिक हिँडडुल गर्ने स्थानीयलाई आवागमनमा सहज हुने विश्वास व्यक्त गरेका छन्। उनले स्थानीयको आवश्यकतालाई ध्यानमा राखेर सीमित स्रोतसाधनका बीच सडक निर्माण गरिएको बताएका छन्।
सडक निर्माणमा समाजसेवी मोहन भण्डारी, लक्ष्मण शर्मा र गोकुल सुनारलगायतले श्रमदान तथा सहयोग गरेका छन्। त्यस्तै, निर्माण सामग्री ढुवानीका लागि यज्ञराज पन्त र मनोज बिसीले ट्र्याक्टर उपलब्ध गराएका छन्।
वडा कार्यालयका कर्मचारी लेखबहादुर क्षेत्री, अमृत कठायत, पवन खड्का र राजीव कुमाल पनि सडक निर्माणमा श्रमदानसहित खटिएका थिए।
Discussion about this post